Shillong, Naitung, 09: U Symbud Myntri Rangbah ka Jylla uba long ruh u Chairman jong ka Regional Committee na ka bynta ka West Jaiñtia Hills u Bah Sniawbhalang Dhar ha ka sngi Balang u la ong ba shen un sa ïakren bad u Chairman jong ka Regional Committee ka jylla Assam ban ïa pynbeit ïa ka jingïakynad ha ka shnong Lapangap, kaba hap hapoh ka Khanduli-Psiar Sector, katba ki ar tylli ki jylla ki dang pyntyllun ïa ka jingïakren bad pynkut noh shi junom ïa ka jingïajia pud kaba la sahteng da ki phew snem.
“Ngan sa ïakren bad u chairman jong ka Regional Committee na ka jylla Assam bad ngin sa shim ïa ka rai bad ban pynthikna ba ka shongsuk shongsaiñ kan wan phai biang katba ki dang ap ïa ka jingpynbeit pud kaba neh shi junom hapdeng ki ar tylli ki jylla,” ong u Bah Dhar ha ka jingïakren bad ki lad pathai khubor.
Ha kaba pynpaw ba ka jingïakren pynbeit pud ha ka wat kaba ar ka dang ïaid shakhmat, u Symbud Myntri u la ong tad ynda la pynbeit ïa ka jingïakajia pud, ka thaiñ ruh kan sa shongsuk shongsaiñ.
“Ynda ki (Assam regional committee) la kloi, ngin sa ïakren ha kano kano ka por,” u la bynrap.
Katkum ka jingong jong u, ka Khanduli-Psiar bad ka Block I ki dei ki jaka ba dang don jingïakajia kiba dang sahkut ha ka jingïakren ïa kiba ym pat lah ban ïa pynbeit.
U Symbud Myntri Rangbah u la kular ba ka Sorkar ka la shimkhia bha ban pynbeit ïa ka jingeh ha khappud. Hynrei kan dang kham shimpor namarba ka dei ka mat kaba la sah pongding la slem bha.
Haba kylli, u Bah Dhar u la ïathuh ba u Deputy Commissioner jong ka West Jaiñtia Hills u ladep phah ïa ka kaiphod sha Regional Committee.
“Ïa ka kaiphod jong ka Regional Committee yn sa aiti sha ka Sorkar Jylla ynda la shong ïa pynbeit na baroh ar liang,” u la bynrap.
U Bah Dhar u la leit jngoh ïa ka shnong Lapangap, kaba dang hap hapoh ka Nartiang Constituency kaba u mihkhmat, ban lum jingtip halor ka jinglong jingman bad u la kular ïa ki paidbah ban pynbiang ïa ki bor Pulit ki ban ai jingshngaiñ bad ai jingïada ïa ki paidbah.
“Ngi kwah ba kan ym don kano kano ka jingjia ba sngewsih. Ïa mynta ka jinglong jingman ka la kham jaijai,” u la ong.
U la pyntip ba katkum ka jingkyrpad na ki nongshong shnong, ka Sorkar ka la buh ïa ki bor Pulit ban ai jingïada.
“Katto katne ki briew jong ngi kim nud shuh ban leit sha ki pynthor kba. Ngi la bthah ïa u Deputy Commissioner ban pynlong ïa ka jingïalang bad ki nongshong shnong ban ïa pynbeit kham kloi ïa kane ka kam katba lah. Kim dei ban shah pyndik haba ki leit trei leit ktah sha ki kam ki duk jong ki manla ka sngi,” ong shuh shuh u Bah Dhar.
Katkum ka jingong jong u, ki Pulit ka Meghalaya bad ki Pulit Assam ki dang don ban pahara ha khappud.
