Shillong, Jymmang 09: U Myntri ka tnat Social Welfare u Bah Paul Lyngdoh ha ka sngi Thohdieng u la pynbna ba ka sorkar shen kan sa pynlong ïa ka jingjurip ha kylleng ka jylla ne ka statewide survey halor ka jingpyndonkam bakla ïa u drok ban ithuh ruh ïa ki jaka kiba long suk ban pyndonkam bakla ïa u drok.
Haba kren sha ki lad pathai khubor u Bah Lyngdoh u la ong ba kane ka survey, kaba long ruh ka jingsdang kaba kongsan, yn pynlong hapoh ka jingïatreilang bad ka United Nation Organization on Drugs and Crimes (UNODC).
“Kane kan ïarap ïa ngi ban ïoh ki jingtip kiba dang jia shen bad kumjuh ruh ban ithuh ïa ki jaka halor ki jingsuk ban pyndonkam ïa une u jingdih pynbuaid,” u la bynrap.
Ban ïakhun ïa ka jingeh jong ka kam khaiï drok ha ka jylla, u Myntri u la ïathuh ba ka sorkar ka dang don ha ka kam ban thied artylli ki kali, ki ban khmih ïa ki narcotic scanning, ha kawei na ki ka la don mynta ha lynti. “Ngi khmih lynti ba da ka jingtuklar ba khlem shongthait jong ka DGP, kane ka kam kan sa long shen,” u la ong.
Na ka liang jong u, u la bynrap shuh shuh, “Haba ïadei bad ki Sniffer dog, nga kmen ban sam bad phi ba mynta ïa kitei ki ksew la nang hikai. Kan shim por sa kumba 6 bnai ba kin pyndep ïa ki jingai jinghikai ïa ki sniffer dog.”
Haba ïadei bad ka jingai jinghikai ïa ki VDP bad ki jingsdang ban ïatreilang, u Bah Lyngdoh u la ong ba katto katne ki dorbar shnong ki la wan shakhmat bad ki la aplai ban shah ithuh kum ki VDP.
“Ha Shillong naduh ba la pyntreikam ïa ka DREAM, ki la don tang 11 tylli ki VDP hynrei mynta la khmih lynti ba kin dangkiew arshah naba la ju pynlong ïa ki jingïalang ba manla ka por bad ki dorbar shnong.”
U la ïathuh ruh ba u CEO ka Cantonment Board mynta ka la ïatreilang bad ki dorbar shnong jong ka thaiñ kiba hab hapoh ka cantonment board. Ha Jhalupara kaba don bun kiba sah da ki poi wir, yn buh da ki CCTV.
Haba ïathuh ba ka sorkar jylla ka la ïadon bynta ruh bad ki nongïalam niam, u Bah Lyngdoh u la ïathuh ba ka Catholic Diocese ka la mynjur ban buh ïa ki rehab centre bathymmai. “Kawei na ki kaba ngi la sdang kan long ha RTCC kaba ha Ri Bhoi District.”
