Shillong, K’lyngkot, 25: Ka Ministry of Home Affairs jong ka Sorkar Pdeng ha ka sngi Saitjaiñ ka la pynbna ban ai khusnam sha ki nongshong shnong ka ri ïa kaba la ju pynbna manla u snem ha ka jingrakhe ïa ka Republic Day.
Napdeng ki nongïoh khusnam ha ka ri India, u Prof. David Reid Syiemlieh u dei u Chairman barim jong ka Union Public Service Commission (UPSC) of India.
Ha kane ka kynti, na ka Jylla Meghalaya, u Prof. Syiemlieh u la shah jied ban ïoh pdiang ïa ka khusnam Padma Shri na ka Sorkar Pdeng.
Ïa kane ka khusnam yn sa pynkup burom da ka President ka ri India ha ka jingïalang ba kyrpang ka ban sa long ha Rashtrapati Bhavan la kumno kumno ha u bnai Lber ne Ïaiong manla u snem.
Na ka bynta une u snem, ka President jong ka ri ka la mynjur ban pynkup burom ïa ki 139 ngut ki nongïoh pdiang khusnam bad na kine, 7 ngut ki dei kiba ïoh pdiang ïa ka Padma Vibhushan, 19 ngut ïa ka Padma Bhushan bad 113 ngut ïa ka Padma Shri. 23 ngut napdeng ki nongïoh khusnam ki dei ki kynthei bad 10 ngut kiba nabar ri bad 13 ngut ki dei kiba la khladnoh.
