Shillong, Risaw, 20: Hadien ka jingïakynad kaba la neh la katto katne por hapdeng ki nongshong shnong jong ka shnong Lapangap bad ki nongshong shnong jong ka shnong Tahpat ki bor synshar jong ka West Karbi Anglong District, Assam bad ka West Jaiñtia Hills District, Meghalaya ki la pynlong ïa ka jingïakynduhlang hapdeng ki nongïalam shnong jong kine ki artylli ki shnong ha Border Outpost Assam ha ka shnong Khanduli hapoh ka West Jaiñtia Hills District ha ka Lah Sngi u Blei.
Ïa kane ka jingïalang la pynïaid da u Deputy Commissioner jong ka West Karbi Anglong District u SP Sarma bad u Border Magistrate ka West Jaiñtia Hills District u Bah GH Passah ha ryngkat ka jingdon lang jong u Additional SP jong ka West Karbi Anglong District, u Waheh Shnong jong ka shnong Lapangap u Bah Deimonmi Lyngdoh, u Advocate Bah Erwin K Syiem Sutnga,u President jong ka Synjuk Ki Waheh Shnong Ri Jaiñtia u Bah A. Lipon, u Rangbah Shnong ka Tahpat, u President jong ka Socheng Amreng Border Development Committee u Augustine Hanse bad kiwei kiwei.
U Sarma u la ïathuh ba ka jingïalang ka la shim ïa ka rai ban wanrah biang ïa ka shongsuk shongsaiñ hapdeng ka shnong Lapangap bad ka shnong Tahpat
Halor ka jingdawa jong ki nongshong shnong ka shnong Tahpat ban kem ïa ki briew ba donkti halor ka jingpynïap jong u Oriwel Timung, u Deputy Commissioner jong ka West Karbi Anglong District u la ïathuh ba u Border Magistrate ka West Jaiñtia Hills bad u Bah Erwin ki la ai ïa ka jingkular ban wad ïa ki briew kiba donkti halor ka jingkynnoh shah pynïap u Oriwell Timung hadien ba la mih ka jingïakynad ki Karbi bad ki Khasi Pnar ha ka 9 tarik, Risaw, 2025.
U Sarma ula ong ba u Rangbah Shnong ka Tahpat bad u Waheh Shnong ka Lapangap ki la mynjur ba kan ym don shuh kano kano ka jingkulmar ne huri hura ha ka por ot kba ha kine ki sngi ki ban wan bad u la ong ruh ba ka jingthung dieng kan ïaid ryngkat bad ka jingot kba kumba ju long naduh mynshwa.
