Shillong, Rymphang 18: Ka Sorkar Jylla ka la pynbna ïa ka 21 tarik Rymphang kum ka shuti ha baroh ki district ka Ri-lum Khasi bad Jaiñtia namar ka elekshon Autonomous District Council (ADC) ka KHADC bad JHADC.
Ïa kane ka jingpynbna la pynmih da ka jingpynbna paidbah ba pynmih da u Lat ka Jylla ha ka sngi Balang.
Kane ka shuti kan treikam ha ki District ka East Khasi Hills, West Khasi Hills, Eastern West Khasi Hills, South West Khasi Hills bad Ri Bhoi District jong ka KHADC lem bad ka West Jaiñtia Hills bad East Jaiñtia Hills jong ka JHADC.
La ong ba ki nongtrei kiba trei ha kine ki District bad kiba dei ki nongthep vote ha ka elekshon KHADC bad JHADC kin ïoh ïa ka shuti ba kyrpang ba kin leit thep vote.
Kumjuh ruh, ki nongtrei ka Sorkar Pdeng kiba dei ki nongthep vote ha kine ki elekshon ruh kin ïoh ïa ka shuti ba kyrpang ha ka sngi thep vote.
Ka khubor ka ong ruh ba ha ki karkhana, ki nongbylla sngi, ki nongtrei casual kynthup kito kiba trei shabar jong kine ki constituency, kin ïoh ïa ka shuti da ka jingsiew kat kum ki kyndon ka Aiñ.
La bthah ïa u Labour Commissioner ban pynthikna ba ki nongaikam shimet ba kin pyntreikam pura ïa kane ka hukum katba ïa u Chief Inspector of Boilers & Factories la bthah ba un pynbeit da kawei ïa ka shuti kut taïew sha ka 21 tarik Rymphang, ha ki karkhana kiba donkam.
La ong ba ka jingïathep vote ha ka elekshon KHADC bad JHADC kan long la 21 tarik Rymphang bad ka jingñiew ïa ki vote kan long ha ka 24 tarik Rymphang.
