Shillong, Naiwieng 23: Ka Dorbar Shnong Mawlynnong kaba bna nam ïa ka jingkhuid ha ka dewbah Asia, ha ka sngi Saitjaiñ ka la pynbna ba kan khang noh shi sngi ïa ka jingwan kai ki nongjngohkai, kata, ha ka Sngi U Blei ka ban sdang naduh u bnai Kyllalyngkot 2026.
Ha u kyrwoh khubor, ka Dorbar Shnong ka la pyntip ba la shim ïa kane ka rai hadien ka jingïashong pyrkhat bha da ka jingthmu ban ailad ïa ki nongshong shnong ba kin leit sha ki ïingmane khlem ka jingshah pynthut bad ban pynneh pynsah ïa ka nam ka burom jong ka shnong.
“Ha Mawlynnong, ka Sngi U Blei ka dei ka sngi kaba jan baroh ki leit sha ki jingïaseng ha ki iingmane baroh shisngi, kumta kin ym lah ban ai ïa kano kano ka jingshakri la pynbit pynbiang ïa ka jingdonkam jong ki nongwan shangkai,” ong u kyrwoh bad bynrap, “naduh u Kyllalyngkot 2026, ka shnong Mawlynnong kan plie ïa ka jingwan ki nongwankai tang naduh ka Lah Sngi u Blei haduh ka sngi Saitjaiñ.”
Ha ka sngi U Blei, baroh ki kam bad ki jingshakri kiba ïadei bad ki nongwan jngohkai, kynthup ki restaurant, ki dukan bad ki paiñkhana paidbah kin khang khyrdep lut.
Kane kan ym treikam pat ïa ki nongjngohkai kiba la buh lypa ban sahmiet ha ki Guest House lane ki Homestay ha ki sngi pohïa bad pynjlan ïa ka jingsah jong ki haduh ka sngi U Blei bad kumjuh ruh ïa kito kiba kwah ban wai kamra ha ka miet Sngi U Blei,
Ha kaba ïadei bad kane, ka jingkitkhlieh ïa ka jingshakri bad ka jingpdiang sngewbha kan shong beit ha ki trai jong ki Guest House/Homestay.
Ka Dorbar Shnong Mawlynnong ka la kyntu ïa ki nongjngohkai pyrthei nabar jylla bad nabar ri ba kin burom ïa ka rai jong ka shnong bad ban ïatreilang ruh bad ki nongshong shnong.
