Shillong, K’Lyngkot, 15: Ka Sorkar MDA ka la rai ban khot lut ïa baroh ki kynhun kynthup ïa ki seng saiñ pyrthei bapher bapher ban ïakren sani halor ka jingtyrwa ban pynrung ïa ki kyndon jong ka ILP ha ka Immigration and Foreigners Act 2025, na ka bynta ban pyrkhing ïa ka rung ka mih laitluid jong ki mynder shapoh ka jylla.
Ha ka jingïakren bad ki lad pathai khubor ha ka sngi Palei u Myntri Rangbah ka Jylla Conrad K. Sangma u la kyntu ïa ki kynhun bapher bapher ba kim dei ban kyntait ïa ka jingkhot ïakren jong ka sorkar halor kane ka mat khlem da sngewthuh ne khlem tip bha ïa ki kyndon kiba don hapoh kane aiñ.
“Ngin sa khot ïa baroh ki sengsaiñ pyrthei bad ïa ki sengbhalang ban ïakren ïa kane ka jingthmu,” la ong u Myntri Rangbah haba kynthoh ïa ka jingpyrshah ïa kane ka jingtyrwa khlem da tip bniah.
“Kan long kaba bakla ïa ngi ban shu pynkut khlem da ïohi ïa ka jingshisha bad ïa ka rukom treikam baroh kawei kumno ngin ïaid shakhmat halor kane.”
U Sangma u la banjur ïa ka jingdonkam jong ka rukom treikam kaba tei, da kaba ong, “ka jingsngewkhia jong ngi ka dei ka jingwan buhai shnong beaiñ. Ka mat kam dei ka ILP, ka mat kam dei ka Immigration Act, ka mat kam dei ka MRSSA. Ngi donkam ïa ki aiñ, ngi donkam ïa ki aiñ ba pyrkhing.”
U la kyntu ïa ki kynhun kiba pyrshah ban wan sha ka miej jingïakren, da kaba ong, “Ngim ong ba kaei kaba ngi la tyrwa kan long kaba dei, ngi lah ban bakla… hynrei nga tharai ba ngi lah ban poi sha kata ka jingsngewthuh jingmut tang lada ngi lah ban don ka jingïakren ne ïakren iwei ïa iwei pat.”
Katkum ka jingong jong u, ka Sorkar ka thmu ban don da ki lad ki lynti ban khanglad ïa ki jingwan buhai shnong beaiñ namar ka jingsngewkhia jong ki paidbah bad ki kynhun bapher bapher.
“Ngi dang pyrshang ban ïaid shakhmat bad peit bad wad bniah la kata ka long kaba lah neem kaba lah ban leh,” la ong u Myntri Rangbah.
Haba kyntait ïa ka jingong jong u Nongïalam ka Liang Pyrshah u Mukul Sangma ba ka Sorkar kam shym la lah ban pyntreikam ïa ka Meghalaya Residents Safety and Security Act (MRSA), u Conrad u la ong, “ka MRSSA ka dang pyntreikam bad ha ka jingshisha ha kiba bun ki jaka ngi la buh ïa ka rukom treikam.”
U la ïathuh ba ka Sorkar ka la wanrah ruh ïa ka jingpynbeit thymmai ha ka MRSSA ba la mynjur hapoh ka Iingdorbar Thawaiñ ban pynkhlaiñ shuh shuh ïa kane ka aiñ namarba ha ki kyndon jong ka aiñ ym shym la kdew ban shna ïa ki khyrdop talasi mynder hynrei la kdew tang ha ka Rul.
