Shillong, Lber, 13: Ha ka sien kaba nyngkong eh ka samla Prisca Pyngrope kan sa mihkhmat ïa ka jylla Meghalaya ha ka lympung ïalehkai 2nd Khelo India Para Games ka ban long ha nongbah New Delhi naduh ka 20tarik, Lber haduh ka 27 tarik, Lber, 2025.
Na ka liang jong ka Meghalaya State Para Olympics Association (MSPOA) hapoh ka jingïalam jong u samla Shaiborlang Lyngdoh Mawphlang ka la kitbok kitrwiang ïa ka samla Prisca Pyngrope shwa ban kan leit shim bynta khnang ba kan dup lah ban wanrah ïa ka nam ka burom sha ka jylla Meghalaya.
Ha kane ka sngi, ka samla Prisca bad ki dkhot jong ka Meghalaya State Para Olympics Association ki la leit ban pan ka jingkyrkhu kyrdoh na u Symbud Myntri Rangbah ka Jylla u Bah Prestone Tynsong.
