Shillong, Nailar, 31: Ka Polo Hotels & Resorts kawei na ki shlem buh iingbasa kaba heh tam ha ka thaiñ Shatei Lammihngi ka Ri India ha ka jingdon ki Hotels da ka jingïatreilang bad ka Varun Tea Plantations Private Limited ki la ïasnohkti lang bad ki trai jong ka Ellenbarrie Tea ban plie ïa ka Polo Planters Lodge Resort ha Doars, West Bengal.
Kane ka jingïatreilang jong ka Polo Hotels & Resorts bad ka Ellenbarrie’s kan wanrah sha ki paidbah nongjngohkai ïa ki jingshem ba sngewtynnad.
Ka jaka shongkai pyngngad ba la thmu ban shna ka don ha ka jaka kaba heh 20 akar bad kane ka Resort kan dei ka Villa-only Property haba yn don ki jaka jngi lane ki pool villas haba ki briew ki lah ruh ban ïohi kyndiang ïa ka jingithiang jong ki kper slasha lane “chai bagan”.
Ha ka resort, ki nongwanjngoh kai kin ïohlad ban mad ïa ki jingbam ba laiphew jait bad ban dih ïa ka sha kaba tngen ba la shet na u sla ba la thung ha ki kper slasha bad kin don ruh ki Spa bad kiwei kiwei de ki jingpynbyrngia.
“Ka jingïohi jngai jong ngi ïa ka Polo ka dei ym tang ban shna ïa ki Hotels hynrei ban ai pat sha ki briew ïa kiei kiei ba long tynrai’ ong u Deval Tibrewalla, CEO ka Hotel Polo Towers Group.
“Lyngba ka Polo Planters Lodge Resort, ngi la plie ïa ka lynnong kaba thymmai ha kaba ka Ellenbarie bad ka Polo kin ai ïa ki jingïohmad ba thymmai ha the Doars.”
Ka Aradhita Agarwal kaba mihkmat ïa ka Ellenbarrie Tea, ka la ong, “Ki Doars ki dei ki pdeng bah ha kaba ïadei bad ki kolshor ka rep sla sha bad ka Ellenbarrie ka ïai pynneh ïa kata ka tynrai. Ka jingïatreilang bad ka Polo kan wanrah ïa ka jingkylla ka ban pynsngewtynnad ïa ki nongjngoh kai.”
