Shillong, K’ Lyngkot 07: Ka President jong ka ri India ka Droupadi Murmu kan sa wan jngoh ar sngi ïa ka jylla Meghalaya na ka bynta ban plie ïa ka jingrakhe dap 50 snem jong ka ICAR Research Complex, Umïam bad ia ka Farmer’s Expo 2025 bad ha kane ka prokram kin don haduh 100 tylli ki dukan ha ka 9 bad 10 tarik u Kyllalyngkot.
U Chief Secretary ka Jylla u Bah DP Wahlang u la ong, “ka jingwan jong ka President kan long hapdeng ka por 11.30 baje mynstep bad 2.30 baje nohphai sngi. Ka President kan sa hiar lyngba ka liengsuiñ ha Umroi bad kan sa ïashim bynta ha ka prokram ha ICAR complex. Kan ym wan sha nongbah Shillong. Hadien ka prokram kan sa peit phai biang sha Guwahati bad kan sa leit noh sha kiwei pat ki kam.”
Ha kane ka prokram yn donlang ruh u Myntri ka Sorkar Pdeng uba khmih ïa ka tnat Rural Development, Agriculture & Farmers Welfare u Shivraj Singh Chouhan, u Myntri Rangbah ka jylla u Conrad K Sangma bad kiwei kiwei ki kynrem ki lyndan.
