Shillong, Jylliew, 20: Ka Central Bureau of Communication (CBC), Shillong, kaba hap hapoh ka tnat Information & Broadcasting, Sorkar India, kan rakhe ïa ka International Day of Yoga da ka jingïatreilang bad ka Ramakrishna Mission, Shillong, ha ka sngi Saitjaiñ ha phyllaw jong ka Ramakrishna Mission, Laitumkhrah.
Ïa kane ka jingki lan met yn pynlong bad ka phang kaba mynta u snem, ‘Ka Yoga na ka bynta kawei ka Pyrthei, kawei ka Koit ka Khiah’, kaba ban jur ïa ka bynta jong ka yoga ban ïoh ïa ka jingïatylli hapdeng ka koit ka khiah jong u briew bad ka bha ka miat jong ka pyrthei, da kaba shim na ka jingngeit jong ki nong India kaba ong “Sarve Santu Niramaya” (To ai ba baroh kin lait na ki jingpang).
Ïa kane ka jingki lan met yn ïalam da u nonghikai Yoga ba la shah pyntbit na ka Meghalaya Yog Samiti, u ban sa pyni ïa ka Common Yoga Protocol (CYP) ba la pynbit pynbiang da ka tnad AYUSH. Ka jingïalang kan kynthup ïa ki yoga asana, pranayama, bad ki rukom pynleit jingmut ba la saindur khnang ban kyntiew ïa ka jinglong ba khlaiñ ka met bad ka jingshai ha ka jingmut jingpyrkhat.
Ïa ka jingïalang plie paidbah yn plie da ka jingdonlang ki nongmihkhmat na ka Ramakrishna Mission, Shillong ba kynthup ïa u Swami Hitakamananda uba dei u Secretary ka Mission, ha kaba la synran lang da u Swami Divyaswarupananda bad u Swami Vedeshananda.
Ki nongïashim bynta kin kynthup ïa ki samla pule jong ka Ramakrishna Mission Shillong, ki dkhot jong ka NCC, bad ki kmie ki kpa, kaba pyni ïa ka jingpdiang ïa ka jingkoit jingkhiah ha ka imlang sahlang baroh kawei lyngba ka yoga.
Nalor ka jingpyni ïa ka yoga, ha kane ka jingïalang yn don ki prokram kum ki jingïakop kylli jingkylli hapdeng ki samla pule, kiba thmu ban pynsngewthuh shaphang ki jingmyntoi jong ka yoga, ka riti dustur ba riewspah shaphang ka yoga jong ka ri India, bad ka jingdonkam jong ka International Yoga Day. Ïa kine ki prokram la saindur khnang ban kyntiew ïa ka jingïadei, ka jingpule, bad ka jingsngewtynnat hapdeng ki samla.
Kane ka jingrakhe lang jong ka CBC Shillong bad ka Ramakrishna Mission ka pyni ïa ka bor pynkylla jong ka yoga bad ka jingdonkam ban shim ïa ka rukom im kaba koit ba khiah kaba don tynrai ha ka jingstad jong ka ri India kaba shi rta.
