Shillong, ïaïong, 01: U Myntri ka Sorkar Jylla Bah Paul Lyngdoh uba long ruh u Nongaitktien ka Sorkar Jylla ha ka sngi Thohdieng u la ong ba ka All Party Committee on Railways shen kan sa khot ïa baroh ki kynhun bapher bapher ban pan ïa ki jingai jingmut bad ki jingsngew jong ki halor ka jingthmu jong ka Sorkar ban pynpoi ïa ka lynti Rel.
Ha ka jingïakren bad ki lad pathai khubor u Bah Paul u la ong, “ïa ki jingïalang jong ka komiti ki ban sa long shen yn sa khlieh hi da u Myntri Rangbah. Kane ka jingthmu ka long ban ailad bad plie lad ïa baroh khnang ban ïoh ïa ka sur na kiba bun balang ba kin dup lah ban pynpaw ïa ki jingsngew jong ki.”
“Ngi kwah ban khot lut ïa baroh ki kynhun bapher bapher kynthup ïa kiba pyrshah ïa ka lynti Rel, kiba kyrshan ïa ka tyrwa ban pynpoi ïa ka lynti Rel bad ïa kiba ieng pdeng halor ka jingtyrwa ban wanrah ïa ka lynti Rel namarba ngi kwah ban ïohi ïa ka jingsngew jong ki halor kane ka mat kaba dei ban wan ym tang na kawei ka jingsngew hynrei na kiba bun ki jingpynsngew. Na kata ka daw ïa ki jingsngew ladep ban pynpaw da ki nongmihkhmat, na ki dorbar shnong, na ki kynhun bapher bapher. Ngi kwah pat ban ïohsngew lut na baroh bad ha kaba kut ka sorkar kan sa pyrkhat kumno ban shim ïa ka rai kaba khatduh,” u la bynrap.
U Myntri u la pyntip ba katkum ka jingbthah, u la ïoh pdiang ïa ka jingtyrwa ban pynlong ïa ka jingïalang banyngkong eh jong ka komiti ka ban sa long ha lane shwa kaba kut jong u bnai Ïaiong.
Shuh shuh u la pynshai ba kan long kaba bakla ban ong ba ka All Party Committee kan dei beit thik tang na ka bynta ki seng saiñpyrthei.
“Kam dei satia kaba ïadei tang bad ki seng saiñpyrthei. Ngin sa khot ïa baroh ki kynhun bapher bapher, ïa ki dkhot jong ki sengbhalang bapher bapher bad kaba kham kongsan ruh ban pan jingmut na ki dkhot ba la jied jong ka Ingdorbar Thawaiñ bad na ki Autonomous District Council,” la ong u Bah Pual.
U la pyntip ruh ba ha kane ka khep ka sorkar kan ym pynlong satia ïa kano kano ka jingïakren bad kino kino ki kynhunn.
“Nyngkong eh ngin sa twad jingmut shwa hapoh ka jylla Meghalaya. Ka jingtreikam kan ïaid shakhmat ha kaba ngin sa leit sha kiwei pat ki tnad ha ka por kaba biang,” u la pynkut.
