Shillong, Nailar 20: Ka Sorkar jylla ka la ai ka lad ban shna ïa ka phlim kaba kyrteng “On the Life and Times of U Tirot Sing Syiem”, kaba dei ka phlim shaphang ka jingim une u riewkhraw bad u Syiem Khasi uba la ïakhun da ka jingshlur pyrshah ïa ka jingsynshar ki Dohlieh.
“Kum shi bynta ban pynïaid shakhmat ïa ka jingthmu jong ngi ban pyndonburom ïa ki hero, ki nongïakhun thma bad kito kiba ïakhun da ka jingshlur na ka daw jong ka jingïoh laitluid jong ngi, ka tnat Arts and Culture ka la ai ka lad ban pynïaid shakhmat ïa ka phlim kaba dei halor ka jingim bad ki por jong u Syiem Tirot Sing Syiem’,” ong u Myntri ka tnat Arts and Culture u Bah Paul Lyngdoh haba kren sha ki lad pathai khubor ha ka sngi Balang.
U Bah Lyngdoh u la pynbna ruh ba la aiti ha u nongshna phlim ba pawnam ka jylla u Bah Pradip Kurbah ban pynkhreh ïa ka script bad ban khmih ruh ïa kiwei pat ki jnit ki jnat ba ïadei bad kane ka project.
