Shillong, Jylliew 13: Ka sorkar jylla ka la rai ban pynkhlaiñ bad ban shut pynnep shuh shuh ïa ki bniat jong ka Meghalaya Residents, Safety and Security Act (MRSSA), 2016 khnang ban pynduna ïa ki kam runar kiba la ïoh bsut sha Meghalaya ha ka kyrteng ki nongjngohkai pyrthei.
Kane ka la wan hadien ka jingshah pynïap u nongjngohkai na Indore, Madhya Pradesh u Raja Raghuvanshi ha ka jingleit kai honeymoon sha Sohra bad la ka kurim jong u ka Sonam Raghuvanshi.
Haba kren sha ki lad pathai khubor hadien ba la wai ka jingïalang Kynhun Myntri u nongai ktien ka sorkar MDA Bah Paul Lyngdoh u la ong, “ka Kynhun Myntri mynta ka sngi ka la rai ban bishar biang ïa ka MRSSA kaba la dei lypa ka aiñ kaba la don ban nang pynkhlaiñ shuh shuh ïa ka ban shut pyn nep ïa ki bniat jong kane ka aiñ halor kaei kaba ngi dang shu dep mad ïa kaba la jia ha Sohra bad ban pynthikna ba ngin pynduna ïa ka jingdon ki kam runar kiba jia ha ka jylla Meghalaya ha ka nam kum ki nongjngohkai pyrthei.”
Ha kaba ïadei bad ka jingpynslem ban jingpyntreikam ïa ka inner line permit (ILP) ha Meghalaya, u Bah Paul u la ong ba kane ka kam ka dangsah kut ha ka Ministry of Home Affairs (MHA).
“Ha kaba ïadei bad ka jingsngewkhia halor ka jingdonkam ïa ka ILP, shah ïa nga ban pynkynmaw ba ka Ïingdorbar Thaw aiñ ka la dep shim da ka rai (resolution) jong baroh ki MLA. Kumta kane ka kam ka dangsah kut hakhmat ka tnat ki Kam Pohïing ka sorkar pdeng (MHA), kaba la buh ruh hakhmat ïa bun tylli ki jingkylli, ha kaba ka sorkar jylla ka dang pyrshang ban jubab. Katto katne na kine ki jingkylli kiba dei ki jingshisha ka long ba ka Meghalaya kam dei ka jaka kaba kut, hynrei ngi ïasoh ruh bad kiwei ki jylla ka thaiñ shatei lammihngi kum ka Silchar bad ki jylla kum ka Mizoram bad Tripura,” u la bynrap.
Haba kylli u Bah Lyngdoh u la ong, “Hynrei lada phi leit lyngba ka MRSSA, ki la dep don lypa shibun hynrei ngi donkam ban pynkhlaiñ bad ban pynbha shuh shuh ïa kaei kaba la dep don lypa hapoh ka MRSSA.”
Katkum ka jingïathuh jong u, ka sorkar jylla shen kan sa wanrah ki jingtyrwa na ka bynta ban pynkhlaiñ shuh shuh ïa ka MRSSA.
