Shillong, Naitung 15: U nongïalam ka BJP bad u Myntri ka sorkar jylla u Bah Alexander Laloo Hek u la ong ba ka party kan kyrshan ïa ka jingshim ka rai ba ïamonlang haba ïadei bad ka jingjied ïa u kyrtong MP ka Rajya Sabha.
Kum ka paralok kaba ïatreilang hapoh ka sorkar MDA, u Bah Hek u la ong ba ka party kan sngap ïa ka rai jong ka party kaba heh hapoh ka Meghalaya Democratic Alliance (MDA), kaba kane ka shong ha ka NPP kaba ïalam ïa u lakam synshar ha ka jylla.
U la pynshai ba ka jingkyrshan ka party kam dei na ka bynta uno uno u riew shimet ne ka party hynrei na ka bynta ka rai ba ïamonlang kaba la mih na ki jingïasyllok bad kiwei pat ki paralok ba ïatreilang ha ka sorkar, ba kynthup ïa ka UDP, BJP, NPP, bad kiwei pat ki kynhun kiba la ïapait ïapra bad kiba la ïasoh bad ka kynhun ïatreilang hapoh ka sorkar.
“Ka jingjied ïa u kyrtong ka Rajya Sabha ka shong beit ha ka party kaba heh kaba don ha ka sorkar ba ïasynroplang. Ngi dei ka party kaba rit ha kane ka sorkar synroplang ka MDA. Kumta ngi hap ban sngap ïa ka rai ba ïamonlang. Kumta ka rai ba ïamonlang la ki shim ïa u kyrtong na ka UDP ne HSPDP ne na BJP ne na ka NPP ne na ki kynhun kiba la ïapait na kiwei pat ki political party, kito kiba la pynïasoh bad ka BJP bad ka NPP, ïa kane ngi hap ban sngap ïa ki,” ïathuh u Bah Hek sha ki lad pathai khubor ha ka sngi baar.
“Ngi khlem ong eiei ba ngi kyrshan ïano ïano hynrei kaei kaba ngi ong ka long tang da ka rai ba ïamonlang,” u la bynrap.
