Shillong, Risaw, 17: Ki Pulit jong ka kynhun Anti Narcotic Task Force (ANTF) jong ka East Jaintia Hills District ha ka sngi Baar ha ka por kumba 6:00 baje mynstep ki la ioh kurup ia u dawai Amphetamine (Cryrstal Meth) uba khia 1.017 kilo uba shongdor haduh T.1.15 klur shi kilo ha ka iew khaii beaiñ.
Ki Pulit ANTF jong ka East Jaintia Hills District, kiba la pynlong ia ka jingtalasi ia ki kali ha surokbah National Higwhway-06 ha ka shnong Nongsning ki la iohbat ia kawei ka Bos Night Super kaba don ia u nombar AS01-LC-6216 kaba dang wan na Aizawl, Mizoram.
Ha ka jingtalasi, ki Pulit ki la bat noh ia u Joseph Hmangaih Zula (46 snem ka rta) halor ka jingsuba ba u dei uba donkti ban rah beaiñ ia kine ki dawai kuli.
Ia une uba la shah bat, bad ia ki tiar jong u la kurup noh da ki Pulit katkum ki kyndon jong ka NDPS Act, bad ia ka plastic ba la thep ia u dawai Amphetamine uba khia 1.017 kilo..
Ha ka jingtohkit lyngba ka jingleh Test, la lap ba u dei u dawai Amphetamine (Crystal Meth).
U dawai Crystal Meth u dei u drok uba khlainbor bha bad u shongdor haduh 1.15 klur shi kilo ha ka iew khaii ha ka iew beain.
U Myntri Rangbah ka Jylla u Cornad Kongkal Sangma u la ai khublei bad iaroh ia ka tnat Pulit kaba la iohkem ia ki snar khaii drok.
U Director General of Police, Meghalaya, Dr. L. R. Bishnoi, u la ai khublei ia u Superintendent of Police bad ia ka kynhun jong u kiba la pynlong ia kane ka jingiohkem ia u snar khaii drok.
Halor kane, ki Pulit ki la register da ka criminal case bad kem noh ia u Joseph Hmangaih. Ka jingtohkit halor kane ka dang iaid shakhmat lap ksai sa ia kiwei pat kiba donkti.
