Shillong, Nohprah, 15: Ki nongtrei jong ka Ophis Commissioner of Customs (Preventive) Shillong, kaba hap hapoh ka jingpeit jong ka Ministry of Finance, ka Sorkar India kiba la ioh ia ka jingtip kaba bniah na ki tnat syntiat ba ka don ka jingkit tuh ia ka ksiar bar ri ban khaii tuh lyngba ka khappud ba la kit ha kawei ka kali kaba thmu ban leit sha Barpeta, ki la pynlong ka jingap ktem ha Diengpasoh ha ka sngi Balang bad ioh bat ia kawei ka kali Maruti EECO Van.
Ha ka jingtohkit, la lap ba ia kine ki ksiar ba la thmu ban khaii tuh la buhrieh bha hapoh ka kali. Da ka jingtalasi ia ka kali, la lap ia ka ksiar ba la buhrieh bha hapoh ka khrum jong ka jaka shong kaba hapdeng.
Ka ophis CCP ka la pyntip, ba ki lyngkhot Ksiar ba la ioh kurup ki don haduh 20 tylli ba la song bha da ka Black Tape ha ki saw tylli ki song. Ka jingkhia jong kine kine ki lyngkhot ksiar ka long 2331.82 gram bad shongdor T. 1.42 klur. Ki nongtrei ka Custom ki la kem noh ia uwei u briew bad ka jingtohkit ka la iaid shakhhmat.
Ha kawei pat ka jingpynap ktem ha ka sngi Palei, ki nongtrei ka Custom ki la ioh ban kurup 50 byrni u rynsun China uba khia 950 kilo uba don ia ka kyrteng Huaguang, ia uba la thmu ban khaii tuh lyngba ka khappud. Ka jingtohkit halor kane ka dang iaid shakhmat.
“Kino kino ki riewpaidbah ki lah ban iakhun pyrshah ia ki kam khaii tuh lyngba ka khappud bad pyntip ruh ba ia ka kyrteng jong ki nongai jingtip yn buhrieh noh bad yn ai ruh ia ka khusnam,” la pyntip ka ophis Custom.
