Shillong, Nohprah, 15: Ki shipai BSF ka 193 Battalion, Meghalaya ha ka sngi Palei kiba la ioh ia ka jingtip kaba bniah na ki tnat syntiat ka la pynlong ia ka jingkhynra ha khappud jong ka East Khasi Hills district bad ioh kurup ia ki ïtkhmat kiba shongdor palat 50 lak tyngka. Ia kine ki ïitkhmat la thmu ban shalan tuh sha ka ri Bangladesh.
Shwa kane, ki shipai BSF ki la lap ia kawei ka kali kaba kit palat pud kaba pynieng harud ka lynti khim kaba mih sha khappud. Ha ka jingtalasi, la lap napoh ka kali ba la kit ia ki mar ba la suba ban khaii tuh, khamtam ki ïikhmat. Ia u nongniah bad ia u nongbud la kem da ki shipai BSF hadien ba kim shym la lah ban ai ia ka jubab kaba biang bad halor ka jingbym lah ban pyni ia ki dulir ban kit ia ki ïitkhmat.
Ia kine ki arngut bad ia ki mar ba la ioh kurup, la aiti noh sha ki Pulit ka Dangar Police Station na ka bynta ban leh katkum ki kyndon jong ka aiñ.
