Shillong, Nailar, 13: Wat hapdeng ka jinglong jingman ka bym shngaiñ ha ka thain khappud namar ka jingïaumsnam ha ka ri Bangladesh, ha ka 12 tarik mynta u bnai ki shipai Border Security Force (BSF) jong ka 181 Battalion, Meghalaya ki la ïoh bat ïa kawei ka kali bad ïa ki lai ngut ki briew kiba dang thmu ban shalan tuh ïa ka shini sha ka ri Bangladesh.
Ïa kane ka kali bad ïa ki lai ngut ki snar nongkhaii tuh kiba dei ki nong India la ïoh bat da ki shipai BSF na khappud jong ka South Garo Hills district.
Ka jingïohbat ïa kane ka kali ka long hadien ba ki shipai BSF ki la talasi ïa ki kali kiba ïaid lyngba na ka Mobile Check Post bad hadien ka jingtalasi la lap ba ha kane ka kali la thep haduh shi hajar kilo ka shini ïa kaba la tap da u shyiap najrong.
Ha ka jingtohkit, u nongñiah jong ka kali bad ki nongbud kim shym la lah satia ban pyni ïa ki kot ki sla kiba biang halor ka jingkit ïa kane ka shini.
Ïa ka shini ba la ïoh kurup ki shipai BSF ki la aiti noh sha ka Ophis custom jong ka Dalu ban leh ïa kaba donkam.
