Shillong, Naitung 01: Ka Domsohkhai Sports Club ka la long ka kynhun ka ban iohrah ia ka song pisa kaba T. 1 lak ha ka lympung ialehkai 1st Invitation Footbal Tournament 2024 ba la pyniaid da ka Southern Border Sports Association (SBSA) hadien ba ka la lah ban pynliem noh ia ka Nongkdait Nongtwah Sports Club ha ka jingiakhun phainal kaba la long ha madan Panchiring, South West Khasi Hills District ha ka 29 tarik Jylliew, 2024.
Ha kane ka sngi u Myntri ka Sorkar Jylla u Bah kyrmen Shylla u la long kum u Kongsan ha ryngkat ka jingsakhi lang jong u MLA ka Ranikor Constituency u Bah Pius Marwein, u District Sports Officer jong ka South West Khasi Hills District u Bah Damang Syngkon bad kiwei kiwei kiba la shah khot sngewbha.
Kum ban shu pyntip hangne, ba ka jingpynlong jong ka Southern Border Sports Association ia kane ka lympung ialehkai phutbol ka long ban kyntiew ia ka sap ka phong jong ki samla ha ka jingialehkai phutbol, kata, tang ia ki samla kiba shong basah hapoh ka Ranikor Constituency ha kaba ym shym la shah satia ia kiwei pat ki rangialehkai kiba dei na shabar jong ka Constituency.
Lyngba kane ka lympung ialehkai ka Association don jingthmu ruh ban jied ia ki rangialehkai kiba kynsai napoh ka Ranikor Constituency na ka bynta ban iashim bynta ha ki lympung ialehkai phutbol ki ban sa long ha nongbah Shillong.
