Shillong, Nailar 02: Ka Kynhun Myntri jong ka Sorkar Jylla ha ka sngi Thohdieng ka la wanrah ïa ka jingpynbeit thymmai ha ka Meghalaya Indentification Registration Safety and Security of Migrant Workers Act, 2020 bad ka Meghalaya Identification Registration Safety and Security of Migrant Workers Rules 2020 ban pyrkhing ïa ka jingwanrah ïa ki nongbylla kiba nabar ka jylla.
Ka jingpynbeit thymmai jong ka Sorkar ïa ka Act bad ka Rule ka long khamtam eh ban pyrkhing noh ïa ki nongbylla nabar kiba wan bylla sha kane ka jylla bad ruh ka la jia hadien shi bnai eiei ba ka Khasi Students Union bad ki sengbhalang bapher bapher ka jylla ki la rai ban pyntreikam hi noh ïa ka Meghalaya Residents Safety and Security Act (MRSSA) ban khanglad ïa ki briew kiba wan nabar ka jylla.
U Bah Paul Lyngdoh, uba long u Nongai ktien bad u Myntri jong ka Sorkar Jylla ha ka jingïakren bad ki lad pathai khubor u la ïathuh ba kane ka jingpyrkhing ka long da kaba pynkhlaiñ ïa ka Meghalaya Indentification Registration Safety and Security of Migrant Workers Act, 2020 bad ka Meghalaya Identification Registration Safety and Security of Migrant Workers Rules 2020 ha kaba yn nym shah shuh ïa ki nongbylla na shabar kiba don ki dak sniew ba ki wan bylla sha poh ka jylla Meghalaya.
U Bah Paul Lyngdoh u la ïathuh ba yn sa pyntreikam noh da ka Crime and Criminal Tracking Network System bad hapoh kane ka System yn sa pynthikna da ka tnat Pulit ba ki nongbylla nabar ka jylla kiba la don dak sniew kin ym ïohlad ban wan trei bylla sha kane ka jylla bad shuh shuh ruh u la ïathuh ba kino kino kiba pynkhein ïa kane ka aiñ ka jingshah daiñ kuna kan long ym shuh tang 5 hajar tyngka hynrei la kyntiew sha ka 1 lak tyngka bad lada don pat kiba pynkheiñ biang ïa ki kyndon palat ïa ka shisien, yn set phatok ïa ki lai bnai.
Kum ban shu pynkynmaw, bun ki nongïalam jong ka KSU ki la shah khot hajir ha ki Pulit ha kaba ïadei bad ka jingkhynra ïa ki nongbylla bar jylla namarba ka Sorkar ka ieng ha ka nongrim ba kam dei kamram jong ki sengbhalang ban khynra ïa ki nongbylla hynrei ka dei ka kamram jong ka tnat Labour.
