Shillong, Nailur 06: Ka North Eastern Hills University Students Union (NEHUSU) ka la aipor tang shiphew sngi ia ki bor pyniaid jong ka skulbah NEHU ba kin bishar thymmai noh ia ka Grading System ba la pyntreikam hapoh kane ka skulbah.
Ka NEHUSU ka la byrngem ruh ban bteng biang ia ki jingiakhih kiba tyngeh lada ki bor pyniaid jong kane ka skulbah kim sngap ia kane ka jingdawa.
Da ki phew spah ngut ki samla pule jong kane ka skulbah ki la iashim bynta ha ka jingiaid proseshon na khmat ka Central Library bad pynkut hakhmat ka ophis treikam u Vice Chancellor ka NEHU u Prof. P.S. Shukla ban pynsngew ia kane ka jingdawa.
Ki samla pule ki la dawa ia ki bor pyniaid ka NEHU ban shong bishar thymmai ia ka Grading System namar la shem ba kane ka Grading System ba ai da kane ka skulbah ka dei kaba rit tam haba ianujor bad kiwei ki skulbah kiba don ha ka Ri.
Ha kane ka sngi, ki samla Pule ki la dawa ban pynsangeh shwa ia ka result jong ka 2nd Semester kat bym pat pyntreikam ia ka Grading System bad ban bishar bniah biang ia ka result jong ki Semesters katkum ka Grading System. Ki samla pule ki la dawa ia u Vice Chancellor ba u dei ban hiar shuki namar ka jingmynthi ia ki jingdawa.
