Shillong, Nailur 06 : Ka Shillong Club Ltd kaba la pyniaid da ki bar jylla kam don satia ia ka laisen khaii na ka Khasi Hills Autonomous District Council (KHADC) katkum ka Trading by Non-tribal Regulation 1954.
“Naduh u snem 1924 la aiwai ia ka Golf Course sha ki bar jylla. Kaba sngew lyngngoh ka long ba la aiwai khlem buh por (perpetual lease) kaba la long kumba kane ka jaka ka ladei jong ki bar jylla lane la pyniaid da ki bar jylla haduh kine ki sngi bad mynta ngi iohi ba ka la don ka jinglum ia ka bai rung (Entry Fee) na ki Khasi kiba wankai ha kane ka jaka kaba la poi da ki lak shi taiew,” ong ka KHNAM lyngba u kyrrwoh ba la phah da u Vice President u Bah Thomas Passah.
“Kum ka seng ngim sngewiahap ba u bar jylla un pyniaid ia ka khyndew ka shyiap u Khasi bad ban shim pisa kylla na ki Khasi hi,” bynrap u kyrwoh.
“Ki lai tylli ki Dorbar shnong kiba don ha kane ka thaiñ ki dei ban shimkhia ia kane ka kam ban khanglad ia ka jinglong trai ki bar jylla ia ka Golf Course. Kan long ei ka jingkyrkhu lada yn aiti ban pyniaid da ki samla Khasi kiba la tbit lyngba ki Self Help Group,” bynrap u kyrwoh.
“Ngi dawa jur ia ka KHADC ba kan shimkhia kum ia kine ki briew kiba pynkhieñ ia ki aiñ ka Council,” ong shuh shuh u kyrwoh.
