Shillong, Nailur, 04: U Symbud Myntri Rangbah ka jylla u Bah Sniawbhalang Dhar ha ka sngi Balang u la phah da ka legal notice ïa u President jong ka Meghalaya Pradesh Congress Committee u Bah Vincent H Pala ban dawa ba u dei ban panmap khlem buh kyndon bad ban siew ïa ka bai mynrain khmat kaba kot 100 klur namar ka jingkynnoh bad ka jingpynjah burom.
Ïa ka legal notice la phah sha u Bah Pala halor ka jingkynnoh ba u Bah Sniawbhalang Dhar u dei u nongai ktien ne spokesperson jong ka Rashtriya Swayamsevak Sangh bad ka Bharatiya Janata Party namarba u dang don hapoh ka jingpeitngor jong ka CBI.
Ïa ka legal notice la phah da ki muktiar jong ka Sharan and Associates LLP Advocates and Solicitors sha u Bah Pala la ong, “namarba u briew jong ngi u sngewthuh ba ka kam shakri paidbah bunsien ka dei kaba ju shah kynthoh, ka jingpynphriang ïa ki jingkren lamler bad ki jingkynnoh be-aiñ ka long ka jingpyrshang ban pynsniew ïa ka jinglong bad ka nam jong u hakhmat ki paidbah. Ki jingkren ba la pynpaw ha ka jingïalang bad ki lad pathai khubor ki long kiba la thmu khnang ban pynjah burom ïa ka jingshakri paidbah bad ka dur jong u briew jong ngi na ka bynta ki jingmyntoi shimet jong phi.”
