Shillong, Jymmang, 24: Kawei ka jingjia kaba kham phylla kaba la jia ha ka shnong Nongkynrih, West Jaintia Hills Dist ha kaba 11 tylli ki masi ki la shah rong tuh ha ki runar ha ka miet sngi Palei. Kine ki masi ki dei ki jong ka Kong Manosha Suchiang bad u Bah Moina Nangbah.
Ka khubor ba la ioh na u General Secretary jong ka Hill Farmer Union u Bah Alfondbirth Kharsyntiew uba la phah ruh ryngkat bad ki Video sha ka Batesi Tv ki la iathuh ba ki runar ki la wan ha ka por shiteng miet ban plie ia ka sem bad rong tuh ia baroh ki masi na ka sem.
Hadien ba la ioh jingtip ba ki Masi ki la shah tuh, ki nongrep ki la pyntip sha u Waheh Shnong jong ka shnong Nongkynrih uba la pyntip wut wut sha ka Synjuk ki Waheh Shnong bad kyrpad ia ki shnong ba marjan ban bat ia baroh ki kali kit Masi namarba ka don ka jingshah tuh masi na shnong jong u.
Da ka jingiatrei lang jong ki shnong ba marjan, la iathuh, ba ki runar ki la pyllait biang ia ki masi ha shiteng lynti bad ia ki masi la lap da ki khynnah shnong kiba la ialam biang ia ki sha ka sem.
Mar ia ioh jingtip halor kane ka jingjia ki Nongialam jong ka Hill Farmers Union Central Body bad ki nongialam na West Jaintia Hills District ki la leit bran bran ban ai mynsiem ia ki nongrep kiba mad ia kane ka jingjia.
