Shillong, Nailur, 12: Ka North East Students’ Organization kaba long ka kynhun jongki phra tylli ki seng jong ki samla pule na ka jylla Assam, Meghalaya, Manipur, Mizoram, Nagaland, Arunachal Pradesh bad Tripura ba kynthup ïa ka All Assam Students’ Union, ka Khasi Students’ Union, ka Garo Students’ Union, ka All Manipur Students’ Union, ka Mizo Zirlai Pawl, ka Naga Students’ Federation, ka All Arunachal Pradesh Students’ Union bad ka Twipra Students’ Federation ha ka sngi Palei ka la phah da ka dorkhas sha u Myntri Rangbahduh jong ka ri u Narendra Modi bad sha u Myntri ka tnat Kam Pohing u Amit Shah ban pynpaw ïa ka jingsngewkhia kaba khraw halor ka jingbym kut shuh ka jingïaumsnam ha ka jylla Manipur kaba la kynjoh mynta sha ka 16 bnai kynthih.
Ha u kyrwoh ba la soi da u Chairman u Bah Samuel Jyrwa bad u Secretary General u Mutsikhoyo Yhobu ki la pynpaw ba kane ka jingïaumsnam kaba jlan ka la wanrah ïa ka jingduhei jong ki mynsiem briew, ka jingshah pynjulor ki ing ki sem, bad ka la pynkylla phetwir ïa kiba bun ki nongshong shnong ha ka jylla Manipur.
Ha kajuh ka por, ka NESO ba ka jingïaumsnam kaba la lam wat shaduh u pud ka jingpyndonkam da ki leingsuin Drone bad ki namding missile ka la nang pynsniew dur shuh shuh ïa ka jinglong jingman ha ka jylla Manipur. Ka NESO ka ong ruh ba kum kine ki jingjia kan wanrah ïa ka jingïaphiah arliang hapdeng ki jaidbynriew
Shuh shuh ka NESO ka la kyrpad ïa u Narendra Modi bad ïa u Amit Shah ban ki tuklar noh mardor ïa ka jingïaumsnam ha ka jylla Manipur da kaba khot sha ka miej jingïakren ïaki kynhun bapher bapher khnang ban wanrah biang ïa ka shongsuk shongsaiñ ha ka jylla Manipur.
Ha kane ka dorkhas ka NESO ka la kynthoh ruh ba ka jingsngap jar jong u Myntri Rangbah bad ka jingbym leit jngoh ïa ka jylla Manipur naduh ba la jia ka jingïaumsnam, ka la pynsat shuh shuh ïa ka jingmong kaba la don lypa.
“Ka jinglong jingman ha Manipur ka long kaba shyrkhei, bad ka dawa ïa ka jingshimkhia mardor na ki bor baha khliehduh jong ka Sorkar. Ka jingbym lah ban pynbeit ïa ka jingïakynad kam pynthut tang ïa ka jingshong shngaiñ jong ka Manipur hynrei ka buh jingma ruh ïa ka jingsuk bad jingshngaiñ jong ka thaiñ Shatei Lammihngi baroh kawei,” la ong ka NESO ha ka dorkhas.
“Ka NESO ka kyntu ïa ka Sorkar India ban leh eiei khlem da pynslem shuh bad ban shim ïa ki sienjam kiba khlaiñ ban wanrah biang ïa ka jingsuk ha ka jylla Manipur. Ngi kyntu ïa u Myntri Rangbahduh ba donburom ban kren eiei bad ban leit sha Manipur ban bishar bniah ïa ka jinglong jingman hi dalade bad ban ai jingshngaiñ ïa ki riewpaidbah jong ki ar ki jaitbynriew khamtam ïa ki kynthei bad ki khynnah kiba kham shah ktah ha kane ka jingïaumsnam,” la ong ka NESO.
“Ki paidbah jong ka Manipur ki kwah ban don ba ïohi lem ïa ki jingjynjar jong ki bad ban pynkut noh ïa ki jingïaleh markynti. Ka NESO ka kwah ban thaw da ka komiti jingsuk kaba ha khliehduh, kaba kynthup ïa ki nongmihkhmat na baroh ki jaitbynriew, ban wanrah ïa ka jingpynbeit kaba neh bad kaba suk,” la ong ka NESO.
Ha kaba pynkut, ka NESO ka pynskhem biang ïa ka jingangnud jong ka ban don ka jingsuk bad ka hok ha Manipur bad ka thaiñ Shatei Lammihngi baroh kawei.
“Ngi ngeit ba ka jingleh donbor kam lah satia ban long ka lad ban weng ïa kano kano ka jingeh, bad ngi khot ïa baroh ki jaitbynriew bad ki nongshim bynta ban pdiang ïa ka jingïakren bad ban ïatreilang ban pynïoh biang ïa ka jingsuk. Ka NESO ka kloi ban ïarap ha kino kino ki jingpyrshang kiba tei ban pynbeit ïa ka jingeh kaba dang ïai bteng bad ban pynthikna ïa ka lawei kaba skhem bad kaba shngaiñ na ka bynta ka Manipur,” la pynkut ka dorkhas.
