Shillong, Ïaïong 14: Ka samla Barilang Pyngrope kawei na ki samla kaba ju khih ju ksar bha na ka bynta ban dawa ïa ka hok jong ki samla wadkam ha ka sngi U Blei ka la khot bad wer ïa ki samla wadkam na rilum Khasi bad Jaiñtia ban mih ryntih ha ka sngi Baar mynta ka taiew ha ka por 10:30 baje mynstep ban leit tur sha PTS, Golflink na ka bynta ban pan jubab na ka Central Recruitment Board jong ka tnat Pulit ha kaba ïadei bad ka jingpynrit ïa ka rta thungkam ha ka jingthungkam Pulit.
Dang shen ka tnat Pulit ka la pynbna ïa ka jingpyllait 2938 tylli ki post hapoh ka tnat Pulit. Ha kane ka jingpynbna, la pyntip ba ka rta rung kam na ka bynta ka post Constable ka long 21 snem bad 27 snem na ka bynta ka post Sub Inspector.
Ha u kyrwoh ba la phah lyngba ka Video sha ki lad pathai khubor, ka samla Barilang ka la ong, “ki samla ki la pynpaw ïa ka jingbitar, ka jingsngewsih bad ka jingduh mynsiem jong ki ha kaba ïadei bad ka jingthepkam ha ka tnat Kam Pohing namarba la pynrit syndet ïa ka rta thepkam da kaba pynmih ïa ka Revise Guidline khlem jingpynbna. Ki samla ki dap da ka jingsngew bitar ïa ka Sorkar Jylla kaba leh donbor haduh katne katne. Ki samla ki la pan ïa ka jingpynbeit, hynrei kim ïoh.”
“Ha ka 8 tarik mynta u bnai, ngi ki samla pule Agriculture ruh ngi ïohi ba ka Meghalaya Public Services Commission (MPSC) ki la bakla hangne hangtai bad kloi kloi ki pynmih ïa ka jingpynbeit. Hynrei balei pat mynta ngim ïoh ïa ka jingpynbeit kaba ki samla ki kwah,” la buh jingkylli kane ka samla.
“Ki samla ki la pynpaw ha nga, ym tang ïa ka jingduh mynsiem jong ngi hynrei ki pynpaw ïa ka jingtylli bad ka jingryntih ba ki long kiba kloi ban mih madan da ka jingïaryntih. Ka la dei ka por ba ngin mih madan ba ngin buh jingkylli ïa ka Sorkar ba kumno ka lah ban leh katba mon haduh katne katne ïa ki samla khamtam ki samla kiba la pynkhreh da ki snem bad kiba la pyndep ïa ki jingpule. Ki samla ki la shu duh ïa ka lad ban aplai ( kam) na ka daw ka jingwan lynshop ka jingpang khlam Covid-19. Kum kine ki khynnah ki donkam palat ïa ka jubab na ka Sorkar,” ka la ong.
“Ngin hap ban pyni ba ma ngi ki samla ngim tieng shuh bad kim lah shuh ban leh donbor ïa ngi. Ngi ngin mih ryntih baroh la shisngi ha PTS Golflink namarba ka Central Recruitment Board ka don hangtei bad ngin kylli ïa ki nongthung kam halor kano ka kyndon ba ki mut ban leh kumne,” la ong shuh shuh kane ka samla bad bynrap, “nga kyrpad ïa ki samla wadkam ba kin mih shakhmat bad khlem ka jingïatylli ngin ym lah ban poi shakhmat.”
“Ha ka rta kaba 18 snem haduh 21 snem ki samla ki dang dei ban pynleit jingmut ha ka jingpule katba ka Sorkar ka pynsyllang ïa ngi bad mynta ngim lah shuh ban pynleit jingmut khamtam kito kiba dang pule ïa ka Class-12 bad ha ka Degree Level. Nga kyrpad ïa ki longkmie bad ïa ki longkpa ba kin wan kyrshan lem ïa ngi. Ngin leit khlem jingtieng bad ngin buh jingkylli ïa ka Sorkar ba kumno kan knieh ïa ka hok jong ki samla ba kin tuh ïa ka kam, ba kin tuh ïa ka jingkwah jong ki samla bad ka jylla jong ngi ka dei kaba duk bad kaba duna bha ha ka jingïohkam bad ha ka pule puthi ruh ka dei kaba ran shadien. Sa katno ka Sorkar kan pynjot bad kan pynpra ïa ka jylla,” ka la ong shuh shuh.
