Mairang, Nohprah, 06: Kum ka dak ka jingkynmaw burom ia ka Phan Nonglait kaba dei ka nongialeh laitluid bad ka riewshlur jong ka Hima Nongkhlaw, ka kur lyngdoh Nonglait ha ka sngi Balang ka la kynmaw burom ia ka lyngkhuh sngi iap ba 173 snem jong ka Phan Nonglait da kaba leit buh syntiew bad pynlong ia ka jingialang kaba lyngkot ha phyllaw jong ka ing sah jong ka kaba don ha ka shnong Nongrmai.
La kha ia ka Phan Nonglait ha u snem 1799 bad ka la khlad noh ha ka 6 tarik Nhprah 1850 ha ka rta kaba 51 snem. Ka Phan Nonglait ka dei kaba la don bynta ha ka jingialeh laitluid bad ka kynthei riewshlur kaba nyngkong eh jong kane ka jylla Meghalaya ban ialeh pyrshah ia ki shipai Phareng kaba la jia ha ka jingiakhun thma hapdeng u Syiem Tirot Sing pyrshah ia ki shipai Phareng bad namar ki kam shlur jong ka Phan Nonglait, ki bor synshar jong ka Eastern West Khasi Hills District ki la pynbna ia ka sngi iap jong ka Phan Nonglait kum ka sngi shuti hapoh ka District manla u snem, kata, ha ka 6 tarik u Nohprah.
Ha kane ka jingleh burom ia ka lyngkhuh sngi iap jong ka Phan Nonglait la sakhi lang da u Syiem jong ka Hima Nongkhlaw u Pa’iem PM Syiemlieh uba la long kum u kongsan, u Additional Deputy Commissioner jong ka Eastern West Khasi Hills u Bah M.Diengdoh uba la long kum u symbud kongsan, ki Kur Lyngdoh Nonglait, u Sordar jong ka shnong Nongrmai u Bah Shailes Nongrang bad kiwei kiwei.
