Shillong, Nohprah, 05: U Lamphang jong ka Ïingdorbar Thawaiñ ka Jylla u Thomas A. Sangma ha ka sngi baar u la leit jurip bad pynïaid ka jingïalang pyrkhat kam ha kaba ïadei bad ka jingshna ïa ka Assembly ba thymmai ha Mawdiangdiang.
Ha ki jingïalang, la ïashim bynta lang da u Symbud Lamphang Timothy D. Shira, ryngkat bad u Commissioner & Secretary jong ka Meghalaya Assembly u Dr. Andrew Simons, ki ophisar na ki tnat treikam bapher bapher bad na ka Assembly Secretariat.
U Lamphang u la ïathuh ba la buh por khatduh ban pyndep ïa ka jingtei ïa ka Assembly ba thymmai kan long hashwa u Naitung lane Nailar, 2024. U la ong ba ka jingthmu ban pyndep noh kham kloi ka long na ka bynta ban ïoh pynlong ïa ka Dorbar Synrai ha kane ka Assembly ba thymmai jong ka Meghalaya Legislative Assembly.
“Ngi la khot ïa ki tnat treikam bapher bapher mynta ka sngi . Ngi la khot ïa ka tnat PHE, ka ban shimkhia ban peit ïa ka jingbit jingbiang jong ka um hapoh ka ing. Ngi la khot ïa ka Social Forestry Department, ba kan shimkhia ban peit ïa ka jinglong jingman jong ka jaka bad ïa kiwei kiwei ki tnat kum ka Arts and Culture ka ban peit ïa ka jingpynitynnat ïa ki dur tynrai bad kiwei pat ki tnat treikam kum ka Information and Technology, ka National Informatic Centre. Ngi la shim ïa ki jingai jingmut jong ki tnat treikam khnang ba ka kam kan ïaid shakhmat bad ngim kwah satia ba ka kam kan shu tyllun suki,” la ong u Lamphang.
Ha kaba ïadei bad ka jingshna biang ïa u tnum pyllun (Dome), u Lamphang u la ïathuh ba ladep pynkhuid lut ïa ki synrum ba la twa bad ka jingsdang ban shna biang ka la ïaid shakhmat. U la batai ruh ba ïa u tnum pyllun yn shna da ki nar ban shu pyndait, ha kaba ki tiar kin sa wan poi ha une u bnai lane ha u Kyllalyngkot, 2024. Ka jingpyndait ïa ki nar yn sdang la kumno kumno ha u Rymphang bad ban pyndep ha u bnai Ïaiong.
Shuh shuh, u la ïathuh ba ka jingshna ïa u tnum pyllun yn sa peit bad khmih da ka Indian Institute of Technology (IIT) Guwahati bad ka IIT Roorkee.
Halor ka jingïakren ban pyndep ïa ka wat kaba ar jong kane ka kam, u Lamphang u la pyntip ba ka Ministry of the Development of North East Region (DoNER) ka la ai jingkular, ban mang pisa na ka bynta ka wat kaba ar bad ka jingpynkhreh ïa ka Detailed Project Report (DPR) ka dang ïaid shakhmat.
U la pynpaw ruh ka jingkmen ba ka jingmang pisa na ka bynta ka wat kaba ar kan long ha poh ka mang tyngka jong une u snem.
