48 HAJAR KI NONGTHEP VOTE THIRD GENDER
New Delhi, Lber 16: Ka jingdon jong ki nongthep vote hapoh ka ri India la sakhi ba la ki la nang kiew shwa ba ka ri kan sakhi ia ka jingpynlong ia ka elekshon Lok Sabha. Ia kane la pyntip da ka Election Commission of India (ECI) ha ka sngi Saitjaiñ haba ai jingkhein ia ka jingdon jong ki nongthep vote hapdeng ki kynthei, ki samla bad ki briew kiba don jingduna ha ki dkhotmet.
Ha ka jingiakren bad ki lad pathai khubor, u Chief ElectionCommissioner (CEC) Rajiv Kumar, ryngkat ka jingsynran lang jong u Election Commissioner ba kynthup ia u Gyanesh Kumar bad u Dr. Sandhu ki la pynbna paidbah ia ka Tarik ban pynlong ia ka General Elections 2024 sha Lok Sabha bad ha ki Assembly jong ki Jylla.
Kawei na ki bynta ba kongsan ba la pynpaw da ka Election Commission of India (ECI) ka dei ka jingkiew jong ki nongthep vote khamtam hapdeng ki kynthei, ki samla bad ki briew kiba don jingduna ha ki dkhotmet. Kumba 82 lak ki nongthep vote ki dei kiba don jingduna dkhotmet, 2.2 lak kia la kynjoh ia ka rta kaba 100 snem, 48,000 hajar ngut ki Third Gender.
Kane ka elekshon kan sakhi ia ka jingkiew ki nongthep vote ki samla kiba don 1.8 klur ban iashim bynta ha ka jingthep vote ha ka sien kaba nyngkong eh ha ka jingim ka jong ki. Nalor kata, hapdeng ka rta 20-29 snem ki nongthep vote ki don 19.47 klur.
U Rajiv Kumar u la ong ba ka Commission kan pynthikna ba ka jingpynlong ia ka jingiathep vote kan long da ka lynti kaba khuid, ban leh ruh da kaba tyngeh pyrshah ia ki jingialam bakla.
Da kaba bsut ia ka phang, “Celebrating Inclusivity,” ka ECI ka la iaiban ba ka jingpynlong ia ka elekshon Lok Sabha ha kane ka kynti kan dei da ka lynti kaba khuid bad kaba bym don jingiashah liang.
Haba kyntu ia ki paidbah ba kin iashim bynta pura ha ka jingthep vote, u Kumar u la kyntu ia ki nongshong shnong jong ka ri ba kin pyndonkam hok ia la ka itkiar ba la pynkupbor da ka riti synshar jong ka ri India da ka jingiashim bynta ha ka jingiathep vote, khnang ba yn dup lah ban sngap ia ka sur jong iwei pat iwei bad ban khein lang.
