Shillong, Lber, 16: Ka Election Commission of India (ECI) ha ka sngi Saitjaiñ ka la pynbna ia ki tarik ban pynlong ia ka elekshon Lok Sabha ha baroh kawei ka ri India.
Katkum ka jingpyntip jong u Chief Election Commisioner (CEC) Rajiv Kumar, ka elekshon ha Meghalaya kan sa long ha ka 19 tarik u ÏAIONG 2024 ha ka Phase-I. Ka jingñiew ia ki Vote kan long ha ka 4 tarik u Jylliew 2024.
U Kumar u la iathuh ba ka jingpynlong ia ka elekshon kan long haduh hynñiew bynta ha baroh kawei ka ri. Ka Meghalaya kaba don ar tylli ki Seat ba kynthup ia ka Shillong bad ka Tura kaba hap ha ka Phase-I kan sa thep vote lang bad ki Jylla, kata, ka Arunachal Pradesh, Andaman & Nicobar Island, Andhra Pradesh, Chandigarh, Dadra and Nagar Haveli and Daman and Diu (DNH&DD), Delhi, Goa, Gujarat, Himachal Pradesh, Haryana, Kerala, Lakshadweep, Ladakh, Mizoram, Meghalaya, Nagaland, Puducherry, Sikkim, Tamil Nadu, Punjab, Telangana, Uttarakhand, Karnataka, Rajasthan, Tripura, Manipur, Chhattisgarh, Assam, Odisha, Madhya Pradesh, Jharkhand, Maharashtra, Jammu & Kashmir, Uttar Pradesh, Bihar & West Bengal.
U CEC u la iathuh ba ki don 96.8 klur ngut ki nongthep vote ha ka ri India bad 49.7 klur ki dei ki shynrang bad 47.1 klur ki dei ki kynthei.
U la iathuh ruh na napdeng kine ki don 19.74 klur ki nongthep vote kiba hapdeng ka rta 21 haduh 29 snem.
Da ka jingpynbna ia ka tarik ban pynlong ia ka elekshon ka Model Code of Conduct (MCC) ka la treikam mardor ha baroh kawei ka ri.
