Shillong, Nohprah, 19: Ka Mawphlang PHE Workers’ Union (MPWU), kaba long ka shatri jong ki nongtrei casual bad work charge staff kiba trei hapoh ka tnat PHE jong ka Mawphlang Division ha ka sngi Baar ki la kyrpad ia ka Sorkar ba kan pyllait noh ia ka tulop kaba sahteng naduh u bnai Risaw, Naiwieng bad kumjuh ruh na ka bynta u bnai Nohphrah mynta u snem 2023.
U President jong ka Union u Bah Napoleon Mawphniang ha ka jingiakren bad ki lad pathai khubor u la iathuh ba ka Union ka ladep phah da ka jingthoh sha u Myntri jong ka tnat PHE u Marcuise N. Marak bad sha ki bor bahalor jong kane ka tnat ba kin wad ia ki lad ki lynti na ka bynta ban siew noh ia ka tulop jong ki nongtrei Casual kiba la shakri la 10 snem, 20 snem bad 30 snem kynthih.
“Ha ka 22 tarik, Naiwieng, ngi la phah ia ka shithi sha ki Executive Engineer jong ki ar tylli ki Division jong ka Mawphlang Division bad ha ka 24 tarik Naiwieng, ngi la phah shithi ruh sha u Myntri ka tnat PHE, sha u Deputy Secretary ka tnat PHE bad sha u Commissioner & Secretary ka tnat PHE bad sha u Deputy Commissioner Labour jong ka District Labour Officer ka East Khasi Hills,” u la ong.
Hadien kane ka jingphah jingthoh, u la iathuh, ba ka tnat PHE ka la pyllait ia ka tulop kaba tang shi bnai sha ki nongtrei Casual, kata, na ka bynta u bnai Nailur.
“Ngi kyrpad ia ki bor bahalor ba kin pyllait noh ia ka tulop jong u bnai Risaw, Naiwieng bad kumjuh ruh ia ka tulop jong u bnai Nohprah. Ngim banse ban mih shakhmat namarba ki nongtrei Casual ki dei kiba shu trei mynsngi bad bam da miet namarba ka jingioh jong ki ka long kaba rit bad ka jinglut pat kaba heh,” la ong u Bah Mawphniang.
Ka Union ka la kyrpad ruh ia ka tnat PHE ba kan pyllait noh ia ka pisa na ka Variable Dearness Allowance (VDA) na ka bynta ki nongtrei Casual ka tnat PHE.
U la iathuh ruh ba kane ka jingeh jong ki nongtrei Casual bad Work Charge kam long satia tang ha ka tnat PHE Mawphlang Division hynrei ha ka tnat PHE ha ka jylla hi baroh kawei.
Tang ha Mawphlang Division ki nongtrei Casual bad Work Charge ki don kumba shih ajar ngut, la pyntip u Bah Mawphniang.
Katkum ka jingiathuh jong u Bah Mawphniang, ki bor bahalor jong ka tnat PHE ki la kular ban pyllait ia ka pisa shwa ka Khristmas hynrei haduh mynta ki nongtrei Casual kim pat ioh satia wat ia ka tulop jong u bnai Risaw bad Naiwieng.
Ha kaba iadei bad ka jingdon jong ki nongtrei Casual, Work Charge Staff, Muster Roll bad kumjuh ruh halor ka rukom siew bainong, ka Union ka la pyntip ba kan sa pan jingtip da ka RTI na ka tnat PHE jong ka Sorkar Jylla.
