Shillong, Risaw 31: U nongaibuit ka tnat Social Welfare Bah Paul Lyngdoh ka sorkar jylla ula pynbna ba ka Sorkar ka la rai ban pynïoh Anganwadi Centre (AWC) sha baroh ki Shnong bym pat ïoh hapoh u Lber 2026.
Ïa kane u la ong ba la shim ïa ka rai ha ka jingïalang bishar kam ba la pynïaid da u Myntri Rangbah Conrad K Sangma myn ha ka 29 tarik Risaw, kaba la ïakren ïa kiba bun ki kam bad ki prokram ba la pyntrei da ka tnat Social Welfare ha ka jylla.
U la ong, “Ha ka jingïalang ka rai kaba la shim ka long ba baroh ki Shnong ki bym pat ïoh Anganwadi Centre kin sa ïoh noh. Ngi don kumba 1700 tylli eiei kum kine ki shnong. Ïa mynta kila don haduh 6000 tam ki AWC bad ki 1700 tylli kiba sah yn sa pynïoh noh hapoh u Lber 2026, kaba mut ba baroh kawei ka Jylla kan sa don ïa ki Anganwadi Centre.”
Haba kren bad ki lad pathai khubor u la ïathuh ba la pynbna ruh ba ka Asian Development Bank (ADB) ka la bei pisa ba T.20 klur shisnem ban kyrshan ïa ka Supplementary Nutrition Programme (SNP) ha Jylla.
U la bynrap ruh da kaba ong, “Ka SNP jong ka Sorkar Meghalaya kan nang kham heh shuh shuh da ka jingbynrap shuh shuh ïa ki mar bam ki bym pat shah kynthup ha ki jingbam ba la buh bad sam lyngba ki Anganwadi Centre. Namar kane, ngi sngewkmen ban pynbna ba ka ADB kala dep wan shakhmat ban kyrshan ïa ka Sorkar Jylla da ka jingbei pisa ba T.20 klur shisnem na ka bynta ka SNP ba kynthup ia ki jingbam ba la shet (HCM) bad ki marbam ba ai rah sha Iing” ong u Bah Paul.
U la ong ba ki AWC kin ai ïa ki jingbam ba dang shu dep shet arsien ha ka shi sngi ryngkat bad artylli ki pylleng ha ka shitaïew ïa ki khynnah kiba hapdeng ka 3-6 snem ka rta.
U nongaibuit ula pynbna ruh ïa ka jingthmu jong ka Sorkar ban kyntiew kyrdan ïa ki 2000 tylli ki AWC da ki solar panel bad ban aiti ïa ka jinglong trai na ka Sorkar sha ki Shnong.
Haba ong ban pynkhlaiñ ïa ka Early Childhood Care and Education (ECCE), u Bah Paul ula ong ba ka Sorkar kan sa thaw ïa ka post jong ka kam Lady Supervisor, ka ban tip kum ka Assistant to Child Development Project Officer (CDPO).
U la pyntip ba u Myntri Rangbah un sa leit ban jurip man ka lai bnai ban bishar ïa ki jingtreikam jong ki Centre bapher bapher.
U la bynrap da kaba ong ba ka Sorkar ka la mynjur ban thungkam ïa u Nutritionist u ban sa leit lum nuksa ïa ki jingbam bad ai kaiphod sha ka Sorkar.
