Shillong, Nohprah, 19: Hadien ba u President ka VPP u Bah Ardent Basaïawmoit u la byrngem ba ka VPP kan pynlong da ka jingïakhih paidbah lada ka Sorkar Jylla kam lah ban pynbna paidbah ïa ka kaiphod jong ka Expert Committee on Reservation Policy, u Myntri Rangbah ka Jylla u Conrad K. Sangma ha ka sngi Thohdieng u la ong ba kam long kaba suk ïa ka Sorkar Jylla ban shu pyllait noh marmar sha ki paidbah ïa ka kaiphod namarba ka dei ka kaiphod kaba khia 200 kilo bad kaba don kumba 4 hajar haduh 5 hajar sla.
Ha ka jingïakren bad ki lad pathai khubor, u Sangma u la ong ba ka Sorkar kan dang hap ban pule bniah shwa ïa ka kaiphod shwa ban pyllait paidbah namarba lada bakla wat tang uwei u Coma ka lah ban pynkylla ïa ka jingmut jong ka jingthoh kaba don ha ka kaiphod.
“Kumba nga la ong ba ka long kaba rben, ngi la hap ban phah kyrpang da ka kali ban shimti ïa ka kaiphod namarba ngim lah ban wanrah ha ka liengsuin ruh namar ba ka long kaba heh bha,” u la ong.
“Kumba nga la ong ka khia 200 kilo, u Chief Secretary ka jylla bad kiwei kiwei ki ophisar ki la hap ban pule sani bha kawei pa kawei ka laiñ. Ka dei ka kam kaba jwat bad haoid ki la pyndep ban leh ïa ka kamram. Ki la aiti ïa kata bad kin sa wanrah ha ka jingïalang Kynhun Myntri bad tang shu ïoh pdiang ngin sa pynbna paidbah namarba kam don ka daw ba ngim lah ban pynbna paidbah,” u la bynrap.
“Kane ka dei ka kam kaba kongsan bha ïa ki paidbah bad ki paidbah ki dei ban tip ïa kaei kaba don ha ka kaiphod. Ngin sa pynpaw paidbah hynrei kumba nga la ong ngi hap ban sngewthuh ïa ka jingshisha namarba ka dei ka mat kaba khia,” u la ong shuh shuh.
“Ki ophisar kim lah ban shu iehnoh wat tang kawei ruh ka sla ne wat tang kawei ruh ka kyntien hynrei ki la hap ban ïaid lyngba manla ka sla bad manla ka kyntien,” la ïathuh u Sangma.
