Shillong, Jymmang 20: Ka Mawlai Town Dorbar (MTD) kaba la iakhun thma pyrshah ia ka jingrung jong u drok shapoh ki shnong bapher bapher kiba hap hapoh ka jylli jong ka shnong Mawlai, mynta ka kynti ka la lah ban pynkylla thymmai biang ia ka jingim jong ki 30 ngut ki samla kiba la im kyrni ha ka jingdih drok ha ki snem ba la leit noh da kaba ai ia ka jingiasyllok manla ka sngi mynta la jan 6 bnai tam eiei ha ka training centre jong ka North Eastern Security Academy (NESA) kaba don hakhmat ka surok VIP Road ha ka shnong Mawkynroh-Umshing, Shillong.
Khnang ban pyntyllun ia kane ka kam, ka Sorkar Meghalaya Democratic Alliance (MDA) ba la lamkhmat da ka National Poeples Party (NPP) ka la ai jingiarap T. 6 lak ha ka sien kaba nyngkong kum ka jingiarap kaba nyngkong bad ha ka Lah Sngi u Blei ka Sorkar Jylla ka la theh jingiarap sa T. 15 lak ha ka sien kaba ar sha ka Mawlai Town Dorbar kaba la kot mynta sha ka T. 21 lak.
Ha ka jingiakren bad ki lad pathai khubor u Myntri ka tnat Social Welfare ka Sorkar Jylla Bah Paul Lyngdoh u la iathuh ba ka Mawlai Town Dorbar (MTD) kan dei ka kynhun kaba nyngkong eh ha ka jylla ban ioh ia ka jingkyrshan pisa na ka Sorkar na ka bynta ban pynbha biang ia ka jingim jong ki samla kiba la ngop bad kiba la im kyrni ha u drok.
U la iathuh ba ka jingai jingkyrshan pisa ia ka MTD ka long ban ai bai, ban pynbiang ia ka jaka sah bad kiwei kiwei de ki jingdonkam.
“Da da ka jingpyllait pisa mynta ngin nang pynjur shuh shuh ia ka jingpyrsahng ban weng bad ban rat dyngkhong ia ki jingsniew jong u drok na kane ka jylla jong ngi,” la ong u Bah Paul.
Haba kylli, u Myntri u la iathuh ba ka Sorkar Jylla ka la thmu ban shna ia ka Rehabilitation Centre ha ka jaka ba don ka Tribal Research Institute (TRI) ha Mawlai Nongkwar ia kaba yn sa pyntreikam pura ynda la pynkynriah ia ka ktem sah jong ki Pulit CRPF sha ka shnong Mawdiangdiang kaba la iaid mynta shakhmat.
“Ka jaka ka la heh (ha Tribal Research Institute) bad ym tang ia ka Mawlai hynrei (ka Rehabilitation Centre) kan jan bha ruh ia ka Jaiaw, Mawprem na ka bynta ban sumar ia ki briew kiba kwah ban lait noh na ki jingshah teh kynjri ha u drok,” la iathuh u Bah Paul.
U la pyntip ruh ba haduh mynta dei tang ka Mawlai Town Dorbar kaba la ioh ia ka jingiarap pisa na ka Sorkar ban pynbha biang ia ka jingim jong ki briew kiba la ngop ha drok bad ha kajuh ka por u la iathuh ba ka Sorkar ka la iatreilang bad kumba 10 tylli ki kynhun ban iakhun pyrshah ia u drok lyngba ka prokram Drud Reduction Elimination and Action Mission (DREAM).
