Ka North Korea kam ju sangeh ïa ki jingpynlyngngoh jong ka ïa ka pyrthei salonsar. Ka jingshisha ka long ba kane ka ri ka khang ïa ka jingwanrung ki nongjngohkai pyrthei, bad phin nym ïohi hi ruh ïa ki dur jong kane ka ri ha ka Instagram, wat la kata ruh, don ki khep ba ki ju lait klep ki jingtip shaphang kane ka ri.
Ïa kane ka ri la ñiew kum ka ri kaba khang khyrdep ïa kiba nabar ri, ym don jingsngew phylla ïa kata haba ka don bun tylli ki aiñ kiba pyntriem shyrkhei. Ka Bor Synshar ka knieh lut ïa ki hok jong ki nongshongshnong jong ka ri bad pynjari da ki aiñ khyllah ba pyrkhing. Kham mynshwa ngi la ïohsngew ïa ka khana kumno ba ka lok jong u Kim Jong Un ka hap ban bud ïa ki kyndon ba pyrkhing, mynta pat ngi wan rah ka jingtip shaphang katto katne tylli ki aiñ khyllah ka North Korea ïa kiba phin nym poi pyrkhat satia:
1. La khang pyrshah ïa ki phlim bad ki jingrwai bar ri.
Ki nongshongshnong jong ka North Korea ki lah ban shahset byndi lada ki peit ïa ki phlim bad tem ïa ki jingrwai nongwei na bar ri. Ha u snem 2015, u nongsynshar donbor jong ka North Korea u Kim Jong-un u la hukum ban pynjot bad pynduh lut ïa baroh ki cassette tapes bad ki CD jong ki jingrwai ba la adong pyrshah khnang ban tehlakam ïa ka jingsngaptuh da ki briew. Lah ban shah rai pynïap lada peit ïa ki phlim na America lane ban pynphriang ïa ki phlim awria. Don tang lai tylli ki channel TV ha North Korea, bad baroh ki prokram la pynïaid katkum ka jingbthah ka Sorkar.
2. Ban kren telephone shabar ri ka dei ka kam bymman.
Ki nong North Korea kim lah ban ïakren telephone shabar ri namar ban leh kumta ka dei ka kam bymman. Katkum ki jingtip ba la ïoh lum, ha u snem 2007 la siat ïap ïa u trai jong kawei ka karkhana ha North Korea hakhmat 150,000 ki briew hadien ba la pharep ïa u ba u kren telephone shabar ri lyngba ki 13 ki phone kiba u pyndait hakhrum jong ka karkhana jong u.
3. Lah ban shah rai pynïap lada ym tieng burom ïa u Nongïalam.
La kheiñ ba ym tieng burom ïa u Nongïalam lada jia ba ïohthiah katba dang don jingïalang bad u Kim Jong-un bad lah ban rai pynïap ïa kita kiba ïohthiah. Katkum ki jingtip ba la ïoh, ha u snem 20015, la siat ïap hakhmat 100 ngut ki briew da ka tup siat eroplen ïa u Myntri Ïada Ri jong ka North Korea, u Hyon Yong-chol namar ba u ïohthiah katba u dang ïakynduh bad u Kim Jong-un.
4. Ka jingpynshitom haduh lai pateng bynriew ha North Korea.
Lada don mano mano ba leh kam bymman ha North Korea, ka jingpynshitom kam hab tang ïa uta lane kata u/ka nongleh, hynrei wat ki Kmie Rad Kpa Rad, ki Kmie ki Kpa bad ki khun ki kti jong kita ki nongleh kin shah pynshitom lang. La pynmih ïa kane ka aiñ khnang ba ki nongleh kam sneiw kin nym phet na ki byndi ba ki shah set.
5. Ki rukom khap sñiuh katkum ka jingbit ba la ai da ka Sorkar.
Baroh ki kynthei bad shynrang ki lah ban khapsñiuh tang ha ki 28 tylli ki rukom khap ba la ai jingbit da ka Sorkar, 18 rukom ïa ki kynthei bad 10 rukom ïa ki shynrang; lada adong pyrshah ïa kiwei pat ki rukom khap nalor kine ba la ai jingbit. U Nongïalam jong ka North Korea u Kim Jong Un u la pynmih ïa kane ka aiñ ha u snem 2013, katba um shym kynthup ïa ka rukom khapsñiuh jongu ha kata ka thup ki kyndon namar u kwah ban pynlong kyrpang ïalade bad ym don hi ruh ba nud ban pyrthuh bud ïa ka rukom khapsñiuh jongu. La khmih lynti ba ki kynthei kiba lah shongkurim ki dei ban khap kham lyngkot ïa u sñiuh jongki bad kiba dang samla ki lah ban ieh kham jrong.
6. La kijong ki kyndon ïalehkai basketball:
Ka Sorkar North Korea ka la pynkylla ïa ki kyndon ïalehkai basketball. Nuksa, ka rukom thep basket ba la tip kum ka “slam dunk” ka long 3 points, ymdei 2 kumba ju long, ki rukom thep basket ba 2-point ha ki lai minit ba khatduh kin long noh 8 point. Kumjuh ruh lada ym lah ban thep basket 3 sien pyrshang thep yn shah khate 1 point.
7. Donkam ban ïoh jingbit ban sah ha ka Nongbah jong ka ri (national capital):
U Nongïalam jong ka North Korea u Kim Jong-un u kwah tang ïa ki briew kiba bit ba biang tam, kiba riewspah bad kiba don iktiar ba kin shong kin sah ha ka Nongbah Pyongyang jong ka North Korea. Kum kita ki briew ki dei ban ïoh jingbit kyrpang ban ïoh shong ha ka Nongbah.
8. Ki khynnah skul ki hap ban siew na ka bynta la ki jong ki miej bad ki shuki:
Ki khynnah skul ki hap ban siew ïa kador jong ki miej bad ki shuki ba ki pyndonkam! Ïa kata ka jingsiew ym shym kynthup ha ka bai skul jongki.
9. La khang ïa ka Bible ha North Korea:
Ha North Korea, la ñiew ba ka Bible kadei ka dak jong ka dustur bad deiti ki ri sepngi namarkata la khang ban pyndonkam ïa ka namar kan pynkylla ïa ki paidbah. Lakem bad pynïap ïa kawei ka kynthei Khristan namar ba ka sam paidbah ïa ka Bible. Ha u snem 2014, la kem bad set patok san bnai ïa u Jeffrey Fowle, u nong America uba leit jngohkai ïa ka North Korea, tang namar ba u klet ïa ka Bible jongu ha ka kamra sum jong kawei ka jaka bam kaba kyrteng ka Chongjin Sailor’s Club.
10. La khang ïa ki iPhones lane ki laptop komputar:
La khang ïa ki nong North Korea ban pyndonkam ïa ki iPhone, ki TV lane ki laptop komputar! Ki nongshongshnong ha kane ka ri ki tip tang khyndiat shaphang ki tiar elektronik bad teknoloji, namar ka aiñ jong ka ri ka buhrieh bun kiei kiei ki jingtip ha kane ka phang.
11. Ki Aiñ Custom kiba pyrkhing bha:
Lada phi dei u nongjngohkai pyrthei yn shah ban rung shapoh kane ka ri hadien ka jingtalasi ba pyrkhing bad bniah bha da ki briew ka Custom ïa ki thup jingrwai jingtem, ki phlim bad ki kot ki sla kiba phi rah bad phi.
12. Ki Byndi ha North Korea:
La ngeit ba don kumba 2 lak ngut ki nong North Korea kiba shahset byndi. Kine ki dei kiba shahkem halor ki jingpharep ba ki don kti ha ki kam bymman ba ïadei bad ka saiñ hima saiñ sima. Lada uno uno u leh kam bymman ba ïadei bad ka saiñ hima saiñ sima, la set slung lang ïa ki ba ha-ïing jongu baroh. Lada jia ba u ïoh phet tuh na byndi, yn pynïap lut ïa baroh kiba ha-ïing hasem jongu. 40 na ka 100 jong kito kiba shah set slung ha kita ki byndi ki ïap naka daw bym biang ka bam ka dih. Bun na kita ki koidi i kumba la phah pyntrei katkum ki kyndon ba shongnia, pynban bunsien ki hap trei shitom haduh ban da ïap syndon.
13. Ka Almanak ba ïapher na kaba ju pyndonkam da ka pyrthei baroh.
Ka North Korea ka don la ka jong ka Almanak ba ïapher na kaba ju pyndonkam da ka pyrthei baroh ïa kaba la tip kyrteng kum ka Juche calendar. Kane ka almanak ka sdang naduh 15 tarik u Ïaïong 1912 kaba dei ka sngikha jong u nongïalam pynkhih pyrthei baieid eh jong ki, u Kim Il Sung.
14. Ka jingjied ha ka elekshon tang ïa uwei u nongïalam
Ka North Korea ka ju pynlong ïa ki elekshon bad baroh ki nongshongshnong kiba lah 17 snem shaneng ka rta ki hap ban shimbynta beit ha ki elekshon, tangba ki elekshon kim long kiba laitluid. Ha man kawei pa kawei ka elekshon ki nongjied ki don tang kawei ka lad ban jied. Ka jingmih nangta ka long ba 100 na ka 100 ki nong Korea ki jied ïa u nongïalam baieid jongki.
15. U Kim Il Sung u dei u nongïalam ba shisha jongki.
U Kim Il Sung, u nongïalam ba nyngkong eh jong ka North Korea hadien ka jingïakhih ki communist revolution, uba la ïap la slem bah, hynrei dang ñiew hi ïa u kum u nongïalam jong kari. Dei na kata ka daw ba u khun jongu bad mynta u ksiew jongu ki la shimti kum ki nongsynshar jong ka ri.
16. Ka Aiñ pyrshah ïa u Kynja (Marijuana)
Ka long mar khongpong ban tip ba ka ri kaba pyrkhing bha ha kiei kiei baroh kam ju don jingeh ha kaba ïadei bad ki kynja jingdih pynbuaid. Kalong be-aiñ ban pyndonkam, die lane buh ïa u Kynja ha North Korea. Wat la kata, u Kynja u mih kynrei bad laitluid bha harud ki surok, kumta lada don mano mano ba kwah ban shim kabu ki lah ban leh da kaba suk jai jai.
17. Ban kren beiñ ïa u Kim bad ïa kiba ha-ïing hasem jongu lakheiñ ba ka long ka Jingkren beiñ Blei.
Baroh ki nong North Korea kiba im hapoh ka jingsynshar jong u Kim Jong-un ki dei ban smai ba kin shaniah skhem bad kohnguh beit ïa u, ia ki ba ha-ïing hasem jongu bad ïa ka ri. Lada don ka jingsuba ba ñiewbeiñ ïa ka ïing ka sem u Kim, ka Sorkar North Korea ka ñiew ïa kata kum ka jingbeiñ Blei ïa kaba dei ban pynsaja tyngeh. Kane ka aiñ ka treikam ruh ïa baroh kiba wan buhai shnong ha North Korea bad ïa ki nongwan jngohkai pyrthei na bar ri. Lada suba ba don ka jingma lane jingñiewbeiñ kan ïalam beit sha ka jingshahset along lane wat shaduh ka jingshahpynïap. Don bun kiba tip shaphang ka jingjia ïa uwei u khynnah skul na American u ba kyrteng u Otto Warmbier. Uta u khynnah u la leit sha North Korea ryngkat bad kawei ka kynhun jngohkai pyrthei, u la shah kem noh ka kad liengsuiñ Pyongyang namar ba u pyrshang ban tuh ïa kawei ka dur antor (billboard) kaba don ha ka kamra hotel ba u sah. La set ïa u Warmbier hapoh along, la pyllait ïa u hapdeng ka jingkhrew bad u la khladnoh tang hadien katto katne por ha u bnai Jylliew 2017.
18. Ym shah ban mih na ka ri.
Phi lah ban lyngngoh balei ki nong North Korean, kim phet noh na la ri haba ki hap ban shah khum ha kum kita ki aiñ ba pyrkhing. Ka daw ka long ba kim lah. La mana tyngeh ïa ki nong North Korea ba kim dei ban mih sha bar ri, lada don mano mano ba jam shabar u pud u sam jong ka ri khlem da biang ki kot ki sla yn siat ïap beit ïa ki da ki shipai pahara. Ka jingpynsaja ba kordit sat kan hab ha kito kiba pyrshang ban phet ne rieh na ka jingsynshar donbor jong u Kim, bad kaba thikna hi kadei ka jingshah pynïap.
19. Ki kyndon ba pyrkhing bha ïa ki nongjngohkai pyrthei.
Ka Sorkar North Korea ka peit pyrman bha ïa kino kino ki nongjngohkai pyrthei kiba wan rung hapoh ka ri. La buh nongsynran ïa man uwei pa uwei u nongjngohkai pyrthei ban don naduh kapor ba wan haduh ban da leit phai noh. Lada don mano mano ba iehnoh ïa ka kynhun ba ïawan lang lane ba pyrshang ban ïakren ïa khana bad ki trai shnong, yn kem beit ïa kum ïa kita. Ryngkat bad kine ki jingpyrkhing, ïa ki nongjngohkai pyrthei la ïalam tang sha ki jaka bad ki lynti ba lah dep jied lypa.
20. Ym lah ban lait na ka jingrungkam Shipai.
Baroh ki nong North Korea ki hap ban rung ha ka kam shipai. 10 snem na ka bynta ki shynrang bad 7 snem ïa ki kynthei.
21. Ka jingpynlip bording man la ka miet.
Ki nong North Korea ki hap ban mad ïa ka jingpynlip bording man la ka miet namar ka jingkyrduh bording hapoh ka ri. Donkam ban ïoh jingbit shwa ban pyndonkam ïa ka bording elektrik bad ka long be-aiñ ban buh ha ïing ïa ki kor pynkhluit jingbam (microwave).
