New Delhi, Nailar : U Balvant Parekh ïa uba la ju tip kum u Fevicol Man jong ka India, u dei uwei na ki heh spah ha India bad ka jingdon jingem jong u mynta ka poi haduh 88,000 klur tyngka. Hynrei ka jingïaid lynti jong u Parekh kam dei satia kaba suk, u la trei ruh kum u Peon jong kawei ka kompeni bad um don jaka sah bad u hap ban sah ha ka sem dieng jong uwei u paralok jong u.
La kha ïa u Parekh ha Mahuva, ka sor kaba don ha Bhavnagar District jong ka Gujarat. Naduh ba u dang rit u Parekh u ju kwah bha ban long nongkhaïi kumba ju leh ki nong Gujarat hynrei ki kmie ki kpa jong u ki kwah ba un long nongïasaid aiñ. Kumta la phah pule ïa u sha Government Law College ha Mumbai. Ka por ba u dang leit pule ka dei ruh ka por ba u Mahatma Gandhi u dang ïakhih bha bad u ruh u la ïa snohkti lang ha ka jingïakhih Quit India Movement.
U kpa jong u Parekh u kwah ba u Parekh ruh un long kum u parad jong u ba un long u nongïasaid aiñ. Kumta hadien ba la pyndep ïa ka jingpule u la sdang ban trei kum u nongïasaid aiñ hynrei tang katto katne por u la sangeh noh namarba um sngewtynnad namarba u lap ba bun kaba u hap ban thok ban shukor ha ka jingïasaid jong u. U la shong katto katne por khlem kam khlem jam bad u la ïathoh shongkurim ïa ka Kantaben. Khnang ban lah pynbiang ïa ki jingdonkam ha ïing u la leit trei kum u Peon ha kawei ka kompeni khaïi dieng bad ma u bad ka lok ki sah ha ka sem dieng jong uwei u paralok jong u.
U Parekh u dap tang da ki jingpyrkhat kumno ba un seng noh la ka jong ka kam ka jam bad khatduh u la ïoh ïa ka lad ban leit sha Germany bad dei na Germany u la ïoh ïa ka buit kumno ban seng kam lajong. U la pynïaid ïa ki kam jong ka kompeni Hoechst ha India hynrei ha u snem 1954 u la seng ïa ka kompeni lajong ka Parekh Dyechem Industries kaba pynmih ïa ki tiar kiba pyndonkam ha ka jingthaiñ jaiñ.
Ha katei ka por um pat nang ban ai kyrteng kumno ïa ka kompeni jong u hynrei dei ha u snem 1959 u la ai kyrteng da ka Pidilite, u la pynmih ïa ka Fevicol bad kiwei pat ki dawai pyndait bad ki dei ki misteri dieng kiba pyndonkam bha ïa ki mar jong u. Nyngkong u don tang kawei ka dukan jong ka Fevicol Pedilite Industries. Hadien kata u la pynmih ïa ka Feviquick bad ïa ka M-Seal bad kitei ki dei kiba ïaid ïew bha tad haduh ba mynta u la kylla long uwei na ki 45 ngut ki heh spah tam ha India.
