Shillong, Jylliew, 03: Ym tang ki kyrtong, hynrei wat ki 22 lak tam ngut ki paidbah nongthep vote kiba la pyndep ia la ka jong ka kamram ban leit thep ia ki vote ki jong ki ha ki Polling Station bapher bapher jong ka jylla ki la suhkpoh suh snier namarba ka sngi niew ia ki vote na ka bynta ka Elekshon Lok Sabha ka ban sa long ha ka 4 tarik u Jylliew, 2024.
Katkum ka jingai jingkheiñ jong u Chief electoral Officer (CEO) ka jylla ha ka Lah Sngi u Blei, ki paidbah kiba leit thep vote ha ki Polling Station ha Shillong ki long 10,33,249 ngut bad 6,72,286 ngut ha Tura. Na kine, 3884 ngut ki dei ki nongthep vote ba hap leit ia ki kamram elekshon, 2345 ngut ki dei ki nongthep vote ba la kynjoh ia ka rta kaba la 85 snem shaneng, 2272 ngut ki dei ki nongthep vote ba don jingduna ha ki dkhotmet, 7413 tylli ki Postal Balllot na ki General Voters bad 2381 tylli ki Postal Ballot jong ki Service voters.
Ki kyrtong kiba la aireng na Shillong Seat ki long u Sitting MP jong ka Congress u Bah Vincent H. Pala, ka Myntri jong ka Sorkar jylla ka Dr. Ampareen Lyngdoh kaba iakhun na ka NPP, u Bah Robertjune Kharjahrin uba iakhun na ka UDP ba la pynieng da ka Regional Democratic Alliance, u Dr. Ricky AJ Syngkon uba iakhun na ka VPP bad sa arngut ki kyrtong shimet ba kynthup ia u Prof. Lakhon Kma bad u Bah Peter Shallam.
Katba ki kyrtong kiba aireng na Tura Seat ki long ka Sitting MP jong ka NPP ka Agatha K. Sangma, u Saleng K. Sangma uba iakhun na ka Congress, u Zenith Sangma na ka TMC bad u Laben Ch. Sangma uba iakhun kum u kyrtong shimet.
U CEO u la pyntip ba ka jingniew ia ki vote kan sdang naduh ka por 8 baje mynstep. Ki don 369 tylli ki miej niew vote ha ki 7 tylli ki Districts na ka bynta ka Shillong (ST) PC bad 244 tylli ki miej niew vote na ka bynta ki 5 Districts jong ka Tura (ST) PC.
Ia ka Mawlai Constituency yn niew haduh 9 sien namarba ka dei kaba bun tam ha ka jingdon jong ki nongthep vote.
