Shillong, Jylliew, 03: Ka Overseas Nursing Job Fair kaba la long ha u snem 2023 ka la long kaba jop hadien ba 27 ngut ki samla kynthei kiba pule Nursing na kane ka jylla Meghalaya ki la shah jied ban sdang noh ia ka lynti iaid kaba thymmai na ka bynta ban leit trei sha ka ri Japan hadien ba ki la pyndep ia ka jingshah hikai.
U Myntri Rangbah ka Jylla u Conrad K. Sangma u la leit ban iakynduh kyrpang ia ki arngut ki samla kynthei kiba la don sha ka ri Japan ban shakri kum ki Nurse ha ka Kobe Kaisei Hospital, Kobe, Japan. Kine ki arngut ki dei kiba la tip kyrteng kum ka samla La-i-kyrmen Khardesaw bad ka samla Jenisha Lyngdoh.
Ki don haduh 27 ngut ki samla kynthei kiba la pynrung kyrteng hapoh ka NAVIS na ka bynta ka language training bad ka cultural immersion ha Bengaluru. Na kine, 25 ngut ki la pas ia ka N4 bad ia ka N5 examination tang ha ka sien kaba nyngkong bad ki la ioh pdiang ruh ia ka jingtyrwa rung kam.
San ngut ki Nurse ki la ioh pdiang ia ka Visa bad arngut ki la leit sha ka ri Japan ha ka 27 tarik, Jymmang, 2024. Sa kiwei pat ki dang ap ia ka Visa. Haduh 14 ngut ki Nurse ki la shah thungkam ha ki hospital bapher bapher jong ka ri Singapore lyngba ki Agency bapher bapher bad kin sa ioh ban rungkam hapoh 3 bnai.
Ka Sorkar ka la iasoi ia ka Dulir jingiasngewthuh jingmut bad ki saw tylli ki Kynhun ha ka 7 tarik Nohprah, 2023 ban ai jinghikai na ka bynta ka ktien ka thylliej bad ban pynrungkam ia ki samla ka Jylla Meghalaya ha ka ri Japan, United Kingdom, Singapore bad ha United Aram Emirates.
Ka Sorkar Jylla ka la plie lad ia ki samla lyngba ka “Skills Meghalaya” Scheme, ha kaba ka la iarap pisa ruh mar T. 50,000 hajar lyngba ka Meghalaya State Skill Development Society (MSSDS). Lyngba kane, ka sorkar ka la buh hakhmat ia ka thong ban pyniohkam lai spah ngut ki Nurse ha ki snem ki ban sa wan.
