Shillong, Nohprah, 14: Ka Sorkar Jylla kan pynlut pisa palat 23 klur na ka bynta ban pynlong ia ka Meghalaya Games ha Tura, West Garo Hills District naduh ka 15 tarik haduh 20 tarik, Kyllalyngkot, 2024.
Palat 3,000 hajar ngut ki nongialehkai kin sa iashim bynta ha ki 22 tylli ki jingiakob. Yn sa pynlong ruh ia ki jingialehkai tynrai kum shi bynta ban kyntiew ia ka kolshor jong ki Khasi, Jaiñtia bad Garo lyngba ka sport.
Ha ka jingiakren bad ki lad pathai khubor, u Myntri ka tnat Sports and Youth Affairs Bah Shakliar Warjri u la ong ba ka jingpynkhreh na ka bynta ka Meghalaya Games ka la iaid shakhmat.
“Baroh ki la long kiba la khrheh bad ngi pynthikna ba kan long ka lympung ialehkai kaba jop. Nga la leit jurip hi da lade sha Tura la 7 sien eiei ban pynthikna ba ki nongialehkai, ki jaka sah kin long kiba biang,” u la ong.
U la iathuh ba ka Sorkar kan pynlut kumba 23 klur na ka bynta ka Meghalaya Games. Haba pynksan ia kane, u Bah Warjri u la ong, “ngin pynlut khnang ban iohi ba ki nongialehkai kin bit kin biang ha ka leit ka wan bad ka shong ka sah. Ngin sa pynlong 22 ki jait jingialehkai bad ngam tharai ba kin bun than namarba ngi kwah ban ailad ia ki samla, dei na kata ka daw ba ngi pynlut. Palat 3,000 hajar ngut ki nongialehkai kin sa iashim bynta.”
U la ong ba ym don shuh kano kano ka jingshna thymmai ban dang tei namarba ka Sorakr ka ladep pan jingiarap na ki skul bad kolej ban pynsah ia ki nongialehkai bad ia ki Official. Ka jingialehkai kan long ha ki jaka ialehkai bapher bapher ha Tura.
“Ka Maw-point, kaba dei ka jingialeh kai kaba shongshit bha ha Khasi Hills, yn sa pynrung ha kane ka jingialehkai. Ngin sa peit ruh ia ki jingialehkai na Jaintia bad Garo Hills ia kaba ngim pat lah ban shim rai,” u la ong.
