Shillong, Nohprah, 14: Naduh ki nongïaidkai step haduh ki khynnah skul, kiba leit trei leit ktah haduh kiba leit iew leit hat, mano mano ba ïaid ba ieng ha ki surok ha sor Shillong ki mad beit ïa ka jingeh namar ka jingsniew palat ki surok.
Kum ban shu kdew ba jan baroh ki surok ka sor Shillong bad khamtam eh ki rurok ha ka thain Nongthymmai, Garikhana, Demseiniong ki la nang sniew na ka jingtih kabym i kut shuh kaba la pynthut ïa ka leit ka wan jong ki paidbah haduh kala pynlong ïa ka tnad Traffic ban pyndap hi dalade ïa ki thliew kumba la paw ha ki lad pathai khubor khamtam kum ha kane ka por Khristmas kaba dei kawei na ki aiom bakhraw na ka bynta ki khun Khristan ha kylleng ka pyrthei bad kumjuh ha kane ka jylla.
Da kaba shim khia ïa kane, u Vice President ka BJP Meghalaya State Unit u Bah Wankitbok Pohshna u la buh ka jingkyrpad ïa ka Sorkar Jylla ba ka dei ban shimkhia wutwut ban pyllait ïa ki paidbah na ki jingeh namar ka jingsniew palat ki surok ha ki shnong ki thaw khnang ba ka jinglehkmen Khristmas kan long kaba shongkun ym tang ban shu ïa khuslai na ka jingbymbiang ki surok.
U Bah Pohshna u la bynrap, “ngi sngewthuh ba kam long kaba suk ban khanglad ïa ka jingsniew ki surok ki lynti syngkien namar ka jylla Meghalaya ka ïoh ïa u slap ba bun tam ha ka shisnem. Hynrei lada mon hi ka Sorkar ka lah ban shimkhia ban saiñdur janai ïa ka rukom shna surok bad ha kano ka rukom yn lah ban lait na ka jingjot khari khari. Ka party BJP, ka sngewdei ba ka Sorkar Jylla ka hap pynbiang noh da ka kynja song pisa ba la mang lypa ban pynlut marmar ban maramot ïa ki surok manla ka por haba don ka jingjulor la ka dei kaba rit ne kaba heh.”
“Ka long kaba sngewlyngoh haduh katta kattta ba kat haduh mynta khamtam hadien ka jingdon jong ki kor ki bor ba thymmai, ka tnad badei peit ïa ki surok kam pat don ïa ka rukom treikam kaba janai ban khmih bniah ïa kum kine ki jingjia khamtam ban lait na ka jingjlan ban ïoh jingmynjur na ka sorkar ban maramot ïa ki jingjulor kiba rit, namar lada shu ieh ïa ki jingjot jingpeit barit, ka lam pynban sha jinglut bunshah lada leh bymsuitniew naduh basdang kumba ong hi ka ktein phareng, a stitch in time saves nine” la bynrap u kyrwoh.
Kum ka party kaba ïatreilang hapoh ka Sorkar MDA, ka BJP Meghalaya State Unit ka long barabor kaba kloi ban ïatreilang bad baroh ki party kiba sngewïahap jingmut khnang ba ka jylla kan nang kiew nang bha ha baroh ki liang.
“Namar tang da ka jingïatreilang, ngin sa lah ban pyntikna ba kin nym don shuh ki thliew ha ki surok nangne shakhmat bad ka leit ka wan ki paidbah kan aaram khamtam kum lei ha kane ka por aiom khristmas” la bynrap u Vice President ka party.
