BTHAH KA CONGRESS ÏA KI DISTRICT BAD BLOCK PRESIDENT BAN YM KREN KULMAR ha HA KI RYNSAN ELEKSHON
Shillong, Lber 21: U President ka Meghalaya Pradesh Congress Committee (MPCC) ha ka sngi Palei u la iathuh ba ka Congress ka la buh sngi ban thep kyrteng ha ka 25 tarik ha nongbah Shillong bad ha nongbah Tura.
U Bah Vincent H.Pala un sa thep kyrteng ha Shillong katba u Saleng Sangma un sa thep kyrteng ha Tura na ka bynta ban iakhun ia ka elekshon Lok Sabha ka ban sa long ha ka 19 tarik, Iaiong, 2024.
“Ngi la buh ha kajuh ka sngi ha ka 25 tarik, Lber ban thep kyrteng ha Shillong bad ha Tura,” la iathuh u Bah Pala ha ka jingiakren bad ki lad pathai khubor hadien ba la wai ka jingialang bad ki nongialam ka Congress na ki District bad ki Block kaba la long ha Congress Bhavan ha ka sngi Palei.
U la iathuh ba ka party ka la lum ia ki baroh ki District bad ki Block President, ia ki katto katne ki Secretary jong ka party ban pynsngew ia ki nongkren ki ban sa ai jingkren ha ki rynsan ialap elekshon ha ki Constituency jong ki.
“Ka jingthmu ka long ban pynsngerwthuh ia ki nongkren ban batai ia ki kumno ban kren bad ym dei ban kren kulmar bad haba kren kulmar ki briew ki kyntait. Ngi la kyrpad ba kim dei ban kren kulmar bad ban beiñ ban khoh namarba ka Congress ka iapher na ki party riewlum. Kiwei kiwei ki party ki lah ban kren katba ki mon ngi pat kum ka National Party ngi hap ban pyrkhat ia kaba mynta bad ia kaba lashai,” la ong u Bah Pala.
U la iathuh ba shi bnai mynshwa, ka Congress ka la ai jinghikai ia ki District President, ia ki Block President bad ngi la ong ia ki ban kren da ka akor ka burom bad namarba ka dei ka National Election ki dei ban tip ruh ia ki jingkwah bad ki jingangnud jong ka Congress ban iarap ia ki nongrep, ban iarap ia ki nongtrei sorkar, ban iarap ia ki samla, ban iarap ia ki longkmie bad ban iarap ia ki khynnah pule bad kumta ter ter.
Shuh shuh u la iathuh ba watla ka Congress kam pat pyllait ia ka Manifesto hynrei ki jingdonkam ban pynrung ha ka Manifesto ngin sa pynrung shen. “Nga dang shu wan phai na Delhi hynnin ka sngi Balang bad ngi la ioh ia ka Manifesto kaba ngin sa pynkylla ktien na ka Phareng sha ka Khasi bad ngin sa sam ia ki apil ba la leh da ka party ngi dang phah shon bad tang hapoh shitaiew ngin sa lah ban sam sha ki nongtrei ka party,” u la ong.
