Shillong, Lber 21: U President ka Meghalaya Pradesh Congress Committee (MPCC) Bah Vincent H. Pala u la kam ba ka jingbym treh jong ka Congress ban iatreilang bad ka All India Trinamool Congress (AITC) ha Meghalaya ka dei na ka daw ba lada ki nongialam ka ATIC ki leit ban pyniasoh sha ka BJP, kan sa paw pat hadien habud ba dei hi ka Congress kaba phah ia ki nongtrei sha ka BJP.
Ha ka jingiakren bad ki lad pathai khubor ha ka sngi Palei u Bah Pala u la ong, “ha kaba iadei bad ka jingiatreilang bad ka Trinamool Congress ym dei tang ma nga marwei ba shim ia ka rai. Ma nga bad u Bah Ronnie ngi la leit sha Delhi ban iakynduh ia ki nongialam ka TMC. Nalor kata, u Bah Charles Marngar, Bah Gabriel Wahlang, Dr. Celestine Lyngdoh bad u Bah Pynshngaiñ N. Syiem ngi la shong jingialang bad ngi la pyrkhat bha lada ngi phah ia ki nongkyrshan jong ngi ban kyrshan ia ka TMC ha Garo Hills lashai pat lada ki (TMC) ki leit sha ka BJP, ka pyni ba ngi phah ia ki nongtrei jong ngi sha ka BJP, namarba ngi la tip shai ba ki heh ka TMC ki don ka jingiakren bad ka jingiasngewthuh jingmut bad ka BJP.”
“Ka kamram jong ngi kum ki nongialam ka Party, ka long ban batai ia ki heh jong ngi ha Delhi ruh. Ka jingmut jingpyrkhat jong ki nongialam ka TMC ha Shillong ka iapher bad ka jingmut jingpyrkhat jong ka TMC ha West Bengal,” la ong u Bah Pala.
“Hangne (ha Meghalaya) kin sa pyniasoh bad bun kiba la khot ia ki briew jong ngi ban leit sha ka BJP. Ka jingiapher kam dei hapdeng jong nga bad u Dr. Mukul Sangma hynrei ka jingiapher ka long ba ngi ladep tip ba ki la thmu ban mih na ka TMC bad ha kawei ka sngi kin sa pyniasoh sha ka BJP. Balei ngin ngop ha kata ka jingriam jong ki. Kam dei ba nga iapher jingmut ma nga bad u Mukul,” la bynrap u Bah Pala.
“Nga la lei nga la ong ia kine (nongialam ka Congress) khie leit khot ia u Dr. Mukul ban wan (phai biang sha ka Congress) bad nga kloi ruh ban ieh ia ka kam President jong ka party bad ngin ai (ia ka kam President) ha uno uno (u briew) uba u (Mukul) mon hynrei ma u (Mukul) hi u ong ba ka party Congress ka la hiar bad kam myntoi hi ruh ban phet na ka party Liang pyrshah sha ka party Liang Pyrshah bad dei ban ioh hi ia ka bor,” la kam u Bah Pala.
Haba pynksan ba ka Congress kam salia lada don ha ka Liang Synshar ne Liang Pyrshah, u Bah Pala u la ong, “ngi pat haba ngi treikam paidbah ngim pyrkhat hi ruh ia kata ka Liang Pyrshah ne Liang Synshar bad lada ki paidbah ki bynshet ha ngi ia ka bor ban trei ngin trei katba lah la ngi don ha kano kano ka kyrdan.”
