Shillong, Naitung 09: Ki dkhot jong ka Khasi Students Union, (KSU) Shillong Mihngi Circle ha ka sngi Baar ki la pynlong ka jingkhynra Work Permit ïa ki bar jylla kiba trei ha JN Complex, Polo, Shillong.
Ha ka jingkhynra ba la lamkhmat da u President ka KSU Shillong Mihngi Circle u samla Sonstar Nongkhlaw, la lap ba haduh 252 ngut ki nongbylla bar jylla kiba la wanrah da u Kontraktor ki dei ki bym don satia ïa ka Work Permit.
Katba ki dkhot ka KSU ki dang talasi ïa ki kot ki sla jong ki nongbylla bar jylla, la wan poi kyndit u Magistrate ryngkat ki ophisar na ka tnat Labour bad ki Pulit na ka tnat Anti-Infiltration Directorare. Katba u Kontraktor um shym la wan mih satia.
Ha kane kajuh ka sngi, ka KSU Nongthymmai Circle ba la lamkhmat da u General Secretary u samla Ribansing Nongrum ka la pynlong ïa ka jingkhynra ïa ki nongbylla bar jylla kiba trei bylla ha ki bynta bapher bapher jong ka shnong Nongthymmai ha kaba la lap ba bun ki dei ki bym don satia ïa ka Work Permit.
Ki don haduh 191 ngut ki nongbylla ïa kiba ka KSU ka la phah leit phai noh sha ka jaka ba ki wan hadien ba la lap ba kim don satia wat ïa ki kot ki sla kiba baing.
Hadien ba la phah song ïa ki tiar ki tar, u Kontraktor u la pynbiang hi ïa ka Bos ban kit ïa kine ki nongbylla bar jylla ban leit buh shaduh ka shnong Khanapara kaba don markhap bad ka jylla Assam.
Ym tang ha nongbah Shillong, ka KSU Mairang Circle ba la lamkhmat da u General Secretary u samla Robin Nongrem ka la pynlong ïa ka jingkhynra ïa ki nongbylla bar jylla ha kaba la lap ba ki don arngut ki bar jylla kiba kam ba ki trei ha Post Office hynrei kim shym la trei satia ha ka shnong Mairang hynrei ki trei shabar ka shnong Mairang katba ki shong wai ha Mairang.
Ka Seng ka la maham ruh ïa ki trai iing ba ki dei ban beh ïing noh ïa kine ki bar jylla mar mar bad ruh ka seng ka la ai por tang shi sngi ïa kine ki bar jylla ba ki dei ban mih noh na Mairang khlem da pynslem.
Ka seng kan bteng ban khynra na phang ïa ki bar jylla kiba wan shong thap ha Mairang bad ka la kyntu jur ïa ki nongïalam shnong ba kin peit ngor bad ba kim dei satia ban shu ailad ïa ki bar jylla ban shong thap khlem ki jingdonkam hapoh ka shnong.
