Shillong, Nailar 02: Ka National Crime Record Bureau (NCRB) ka la lum thup haba ïadei bad ki kam runar bad ka la ju pynmih pat ïa ka jingthoh ha kaba ïadei bad ki kam sniew kiba jia hapoh ka Ri India. Ka jingthoh kaba la pynmih khatduh dei ha u snem 2022.
Katkum ka kaiphod kaba la pynmih ka kdew ïa baroh ki jylla ha ka Ri India bad kumjuh ïa ki Union Territory katkum ki ejahar kiba buh jingkheiñ hapoh ka Unlawful Activities (Prevention) Act, 1967 (UAPA) na ka bynta jong u snem 2020, 2021 bad 2022.
Kane ka aiñ Unlawful Activities (Prevention) Act, 1967 (UAPA) kam don ïa ka kyndon ban ong ban shna ïa ka jaka set ïa kito kiba la shah kem hapoh kane ka aiñ, pyntip jong u Myntri khynnah ki Kam Pohïing ka sorkar pdeng u Nityannad Rai da ka jingthoh hapoh Rajya Sabha.
Ha ka ri baroh kawei kiba la shah register ejahar ha kane ka aiñ ki long ha u snem 2020 ki don 796 tylli, ha u snem 2021 ki don 814 tylli, 2022 ki don 1005 tylli, haba kheiñ lang ha ki lai snem ki don haduh 2615 tylli.
Kiba bun eh dei ha Jammu bad Kashmir, ha ki lai snem ki la don haduh 947 tylli, ha Utter Pradesh ha ki lai snem kila don haduh 256 tylli, ha Bihar 84 tylli, ha Jharkhand 243 tylli, ha Assam 304 tylli, Manipur 493 tylli, ha Meghalaya 21 tylli, Kerala 59 tylli, bad kitei ki dei ki jylla kiba kham bun kiba la paw ha ka kaiphod ba la pymih da ka sorkar pdeng.
Ki jylla bad Union Territory bym shym don ba shah kem hapoh ka UAPA 1967, ki don 11 tylli, na kine 5 tylli ki dei ki Union Territory bad 6 tylli ki dei ki jylla ba khlem don ïa kiba shah kem hapoh kane aiñ.
