Shillong, Naitung, 11 : Ka Sorkar Jylla ka la shim ia ki sienjam kiba tyngeh pyrshah ia ki Coke Plant be-aiñ da kaba bud ryntih ia ka hukum ba la pynmih da ka iingbishar Meghalaya High Court.
Katkum u kyrwoh ba la phah da u Joint Secretary to the Government of Meghalaya, Forest and Environment Department, la pyntip ba naduh u bnai Nohprah 2022 la leh tyngeh da kaba khang tala ia ki Coke Plant be-aiñ bad ka jingiai bteng ban pynpra naphang ia ki pajwa saiñ dewiong ka la iaid shakhmat khnang ban pynthikna ba kin ym lah shuh ban dang bteng ia ki jingtreikam sa shisien. Ka jingpynpra ia ki Coke Plant ka la bteng haduh u bnai Iaiong, 2023 kum shi bynta ban rat dyngkhong ia ki jingtei kiba be-aiñ.
Kum ban shu pynkynmaw, ki bor synshar jong ka West Khasi Hills District ki la pynbthei ia ki atoskhana bad pynpra ruh ia ki pajwa saiñ dewiong jong ki Coke Plant kiba don ha Shallang lyngba ka hukum jong ka Ingbishar Meghalaya High Court.
Lyngba ka jingbthah jong ka Sorkar bad da ka hukum jong ka Ingbishar High Court, la pynmih ia ki hukum ban kem naphang ia kiba donkti ha lyndet kine ki kam be-aiñ. Namarkata, ka jingpynpra ia ki atoskhana bad ia ki jingtei jong Coke Plant ba long be-aiñ ka la sdang naduh ka 8 tarik, Naitung, 2023. Haduh lai tylli ki atoskhana ladep ban pynbthei haduh ka 10 tarik, Naitung, 2023 bad la buh thong ban pyndep ia kane ka kam haduh ka 20 tarik, Naitung, 2023.
Bun ngut ki briew kiba donkti ban tei be-aiñ ia kine ki Coke Plant beaiñ la dep ithuh bad la iohkem.
Ki sienjam batyngeh jong ka Sorkar ka long ban pynpra beit naphang ia ki jingtei be-aiñ.
Ka Sorkar kan iai bteng ban bat ia ki kyndon jong ka aiñ bad ban pynneh ia ka jingjyrngam jong ka mei mariang ha ka jylla na ka bynta ka jingmyntoi jong ki nongshong shnong. Ka jingrat dyngkhong ia ki Coke Plant ka long kum u mawjam ban kynjoh sha ka thong ban pynneh pynsah ia ka jingjyrngam jong ka mariang bad ka jingtyngkai ia ki um ki wah jong ka thaiñ.
Ka Sorkar ka kyntu ia baroh ki nongshong shnong, ia ki nongialam shnong bad ia ki kynhun bapher bapher ban ai jingkyrshan da kaba iatreilang bad ki bor synshar ha ka jingpynpra ba dang iaid shakhmat ia ki coke plant beaiñ bad ha kaba kem ruh ia kiba donkti ha ki kam be-aiñ.
