Shillong, Naitung 10 : Ka Khasi Students’ Union (KSU) Laskeiñ Circle ha ka 10 u Naitung 2023 hapoh ka jingïalam u President ka Circle samla Javelin Shadap Manner, ryngkat ka jingdon lang u President ka KSU West Jaintia Hills District Unit u Laitphar Syngkrem kila leit ban ïakynduh ïa ka Director of Health Service (MI) Shillong ban pynsngew ïa ki jingduna ba bun hapoh ka Laskeiñ CHC kata naduh ki Doctor bad ka jingbymbiang ki dawai da shin.
Ka seng kala ïoh lad ban pynsngew halor ka jinglehmon palat ki nongtrei jong katei ka jaka sumar, bad ka jingkhein sting jong ki. Kumta na ka liang ka seng kala ïoh ban ïakren sani bha bad ka Director ha kaba ïadei bad kine ki jingeh bad ka DHS bad la kular ban shimkhia mardor bad ban pynbeit noh ïa kine ki jingeh jong ki paitbah katei ka thaiñ kiba donkam jingïarap shisha na katei ka jaka ai sumar sorkar.
Na ka liang ka seng ruh kala kyrpad ïa ka Director ba kan leh kham kloi ïa kane ka kam bad lada jia ba kane ka jingdawa kam urlong satia, ka seng kam banse ban shim pat da kawei pat ka lynti na kham tyngeh, pynkut ka kyrwoh.
