Shillong, Rymphang, 27: Arngut ki snar nongkhaii drok ki la shah kem ha ki Pulit jong ka East Jaiñtia Hills District ha ka Lah Sngi u Blei katba ki dang pynlong ïa ka jingtalasi ïa ki kali kiba wan na Kalain, Cachar, Assam.
U Superintendent of Police ka East Jaiñtia Hills District Giri Prassad ha u kyrwoh ba la phah sha ki lad pathai khubor ha ka sngi Baar u la pyntip ba ki Pulit kiba la pynlong ïa ka jingtalasi kali ha Umkiang ha ka por kumba 10:00 mynmiet ki la bat ïa kawei ka kali Tata truck 1512 kaba don ïa u nombar AS 28 AC -1046 katba ka dang wan na Kalain, Cachar Assam bad rung sha Lumshnong, Meghalaya.
Ha ka jingtalasi, ki Pulit ki la lap ar tylli ki synduk thep sabon ba la suba ba la thep ïa u drok na ka met jong u Dony Paya Mulieh uba la 19 snem ka rta uba sah ha Khliehshnong, Lumshnong, East Jaintia Hills bad na u Langki Rymbai uba la 23 snem ka rta uba sah ha Dongdukan Lumshnong.
Ha ka jingleh tes ryngkat ka jingsakhi lang jong ki riewpaidbah la pynshisha ba u dei u drok ‘Heroin’. Hadien ba la thew, u drok u don ka jingkhia kaba 34.44 gram.
Ïa u drok bad ar tylli ki mobile phone la kurup noh na kitei ki arngut bad ki Pulit ki la register case ha Lumshnong Police Station hapoh ka Section 21(b)/29 NDPS Act. Ka jingtohkit ïa kine ki arngut mynta ka dang ïaid shakhmat.
