Shillong, Rymphang, 27: Ka Hynñiewtrep Integrated Territorial Organization (HITO) ha ka sngi Baar ka la pan jingpynshai na ka Sorkar Jylla ha kaba ïadei bad ka jingpynkhreh ban aiti ïa u dewïong ba ladep tih sha ka Coal India Limited (CIL) na ka bynta ban die lilam ba ladep pynbit pynbiang nadong shadong da ka tnat Mining and Geology bad ïa ka jingdie lilam yn pynlong ha ki district bapher bapher.
Ha ka shithi sha u Director ka Minerals Resources (DMR), u President ka HITO Bah Donbok Dkhar u la ong ba ka seng ka kwah ban ïoh jingtip ha kaba ïadei bad ka jingithuh bad ka jingpynbna ïa ki Designated Depot na ka bynta ka jinglum jingkheiñ ïa u dewïong ban die lilam, ka jingshna ïa ki Depot, ka jingkitkhlieh halor ka kit ka bah ïa u dewïong sha ki Designated Depot, ka rukom ai ïa ka Transit Pass na ka bynta ka jingpynkit ïa u dewïong sha ki Designated Depot bad ki khyrdop mih, ka rukom pynkit ïa u dewïong da ki trai dewïong bad ki nongthied ïa u dewïong ba la lilam na ki Designated Depot hadien ba la aiti ïa ka Transit Pass, ka jingpynshisha ha Designated Depot, ka rukom die lilam bad ka buh jingkheiñ ïa ka pisa bad kiwei kiwei.
Ka Seng ka la pan jingtip ruh halor ki rukom siew ïa ki Royalty, ka GST, CESS bad kiwei kiwei de ki rukom siew ba dei ban siew ïa ki nongshalan dewïong lane da ki nongthied dewïong kiba la ïoh ïa ka Challan/Transit Pass ban kit ïa u dewïong ba la ai da ka tnat Mining and Geology Department lane da ka Coal India Limited.
“Hynrei ngi la ïoh jingtip ba ki don katto katne ki nongthied ïa u dewïong ba ka ophis jong phi kam shym la ai ïa ka NOC ban kit ïa u dewïong wat hadien ba ki la pyndep ban siew lut baroh ki jingsiew katkum ka lynti kaba dei. Ka don ruh ka jingujor ba u Director um trei ban soi ïa ka NOC katba um pat ïoh ïa ka jingbthah ne u kyrwoh na ki bor bahalor jong u. Ngi kwah ban tip mano kita ki bor bahalor ban ai ïa ka Challan ban kit ïa u dewïong lada kam dei hapoh ka bor jong u Director? la buh jingkylli u Bah Dkhar.
“Ka pynlyngngoh ïa ngi ka long balei yn dang don sa kawei pat ka jingpynbeit haba baroh ki jingsiew ladep ban siew lut nadong shadong bad wat ïa ka Royalty bad ka Tax ruh ladep ban siew bad ki nongthied ïa u dewïong ki la bud ryntih ïa ki jingbthah jong ka Ingbishar bad ki bor ba dei peit,” la ong shuh shuh u Bah Donbok ha ka shithi.
