Shillong, Risaw, 25: Ka Jylla Meghalaya ka la kynjoh sha uwei u pat u mawmer ha kaba pyntreikam ia ka Jal Jeevan Mission ban pynpoi ia ka umkor sha ki palat 4 lak tylli ki longiing ha ka jylla.
Haduh mynta T. 3,000 klur la mang pisa hapoh ka JJM na ka bynta Meghalaya. Na ki 4450 tylli ki longing kiba la ioh umkor haduh ka 15 tarik, Nailar, 2019 mynta ka la kynjoh sha ka 4,00,812 lak tylli.
Haba pynbna paidbah ia kane ka jingjop, u Myntri Rangbah ka Jylla Conrad K. Sangma u la ai jingiaroh ia ka kynhun jong ka Jal Jeevan Mission, Meghalaya. “Ka Jylla Meghalaya ka la jam sha uwei u mawmer ban pynioh umkor sha ki 4 lak tylli lyngba ka Jal Jeevan Mission Functional Household Tap Connections (FHTCs). Ngi ai khublei ia u soh ka jingtrei shitom jong ka kynhun Jal Jeevan Mission Meghalaya, katba ngi dang beh ban kynjoh sha ka thong kaba kot 100% FHTCs ha ka jylla jong ngi,” la ong u Sangma.
U Myntri ka tnat Public Health Engineering (PHE) u Marcuise N. Marak u la ong ba ka tnat ka la buh thong ban kynjoh 5 lak tylli ki jingpynpoi ia ka umkor ha shwa u Nohprah, mynta u snem. Ka Sorkar ka la buh thong ban pynioh ia ka umkor sha ki 6.51 lak tylli ki longiing.
“Ka Sorkar Pdeng haduh mynta ka la mang pisa T. 3,000 klur (na ka T. 6,000 klur ) na ka bynta ka jylla Meghalaya,” u la ong.
U Commissioner & Secretary jong ka tnat Public Health Engineering Department ka ka sorkar Meghalaya, bad uba long ruh u Mission Director jong ka Jal Jeevan Mission ha ka Jylla u Syed Md. A. Razi, u la pynpaw ka jingsngewkmen bad ong, ‘kane ka dei ka jingjop na ka bynta ka Jylla. Ngin ym shongthait halor ka jingiaroh bad ngin bteng ban pynlong ia ka jylla Meghalaya kaba pahuh um ha ki sngi ki ban sa wan. Ka jingangnud jong ngi ka long ban iohi ba ki longing ha ki jaka ba kyndong kin ioh ia ki umdor, bad ngin iai btteng haduh ba ngin da poi sha ka sienjam kaba khatduh eh.”
Ka jingiaid lynti jong ka Meghalaya ka pyni ba ka don ka jingiapher ha ka jingioh ia ka umkor ha ki longing ha kylleng ki distrik bapher bapher jong ka jylla. Ka East Garo Hills ka long 80.09%, ka South West Garo Hills ka long 79.02%, ka Ri Bhoi ka long 72.83%, ka North Garo Hills ka long 69.35%, ka Eastern West Khasi Hills ka long 67.56%, ka South Garo Hills ka long 65.56%, ka South West Khasi Hills ka long 65.15%, ka West Garo Hills ka long 59.82%, ka West Khasi Hills ka long 57.52%, ka West Jaiñtia Hills ka long 50.29%, ka East Khasi Hills ka long 50.01%, bad ka East Jaiñtia Hills ka long 44.50%.
Ha u Risaw, 2022, ka Meghalaya ka la ioh khusnam ha ka kyrdan baar ha kaba iadei bad ka jingpyntreikam ia ka Jal Jeevan Mission. Kane ka jingioh jingithuh ka la pynlong ia ka jylla ban kut jingmut ban poi sha ka thong ba la buh hakhmat.
Ka Jal Jeevan Mission, ka dei ka jingthmu ba la pyntreikam ha baroh kawei ka ri, da ka jingangnud ban pynpoi ia ka umbam umdih kaba khuid sha ki longing kiba don sha ki nongkyndong shwa jong u snem 2024.
Ha Meghalaya, na ki 600,000 lak tylli k longiing, kumba 400,000 tylli ki longing antad ki la ioh jingmyntoi na ka jingpynpoi ia ka umkor ba la pyntreikam lyngba kane ka skhim, ka pynpaw ba haduh 61% ka jingdon jong ki longing.
Ka jingiashim bynta lang jong ki dorbar shnong ka la long kawei pat ka sienjam ban kynjoh sha u mawmer jong ka jingjop da ka jingthaw ia ki Village Water and Sanitation Committee (VWSCs) ha manla ki shnong ki ban peit ba baroh ki nongshong shnong kin ioh ia ka um kaba khuid.
Ka Sorkar Meghalaya ka la buh thong ruh ban pyndep pura ban pynpoi ia ka umkor lyngba ka Jal Jeevan Mission shwa ban kut ka jingbuh por jong ka Sorkar Pdeng haduh u Lber, 2024.
